Asina Colegio San Antonio a celebra nan dia di amabilidad

ORANJESTAD (AAN): Riba Diahuebs, henter e scol na Santa Cruz a celebra ‘Colegio San Antonio Kindness Day’! E ta hopi importante pa nan como scol enfatisa e balor di amabilidad (‘kindness’) entre e alumnonan.

   DIARIO a compronde cu for di October, alumnonan a haya preparacion den les cu mentor, a prepara mensahe pa nan mayor of voogd y hunto cu un team di docente a prepara un sorpresa Diahuebs mainta pa tur mayor.

   Nan a splica cu e aña aki nan a dedica e mainta na mayornan y a gradici nan pa nan apoyo y trabao. Ta mayor di un teenager awendia no ta facil y e alunmonan ta reconoce cu e tin su retonan. Tambe nan ta sigur cu tur mayor ta haci nan esfuerzo pa duna nan yiu e mihor futuro y pesey Diahuebs mainta a bisa nan: Danki pa boso trabao!

Mayornan a haya un desayuno chikito ofreci danki na e colaboracion di varios comerciante y instancia.  Nan a hasta logra haya premio pa regala esnan cu a gana den e campaña "Be the i in Kind".

   Nan ta gradici Ministro Endy Croes di Enseñanza cu su bishita sorpresa y muestra di apoyo pa e campaña.  Nan ta spera cu e mensahe plama e balor di amabilidad entre comunidad. Mustra kindness/amabilidad no ta costa nada.  Riba e potretnan pa cortesia FB di Colegio San Antonio, por mira mas di e dia di amabilidad.