“Ashantee a representa Aruba asina bunita mes”

George Winterdaal

ORANJESTAD (AAN): Diamars merdia famia y amigonan tabata den VIP Room di Aeropuerto Internacional Reina Beatrix pa duna bon bini na Ashantee Martus, un dama hoben cu a caba di conquista titulo maximo di Teen Cultura Continental 2022 na Honduras.

   Na su yegada, e organizador George Winterdaal di GW Foundation a hiba palabra y a gradici inmensamente Ashantee pa loke el a haci.  El a splica cu Ashantee a comporta su mes manera un reina henter siman na Honduras.

   “Un biaha mas pabien na Ashantee, danki di curazon pa representa Aruba asina bunita mes,” Winterdaal a indica.  E ta gradici tambe Endy Croes cu for di mainta trempan ta percura pa Ashantee ta bunita di pia te cabez.

   El a gradici tambe Carl Quant, tambe e mama Miriam Contreras kende tabata core pariba-pabao cu Ashantee tur caminda, y a gradidi Derrel Lampe tambe.

   Aruba un biaha mas a haya un corona extra.  George Winterdaal a splica cu Ashantee a bira su reina #40 cu a bin cu un titulo internacional.  E ta hopi contento cu esey.

   Ashantee na su turno a gradici George pa e chens grandi di por representa Aruba.  E ta gradici tambe tur hende cu a bin dune un recepcion asina grandi.  E no a spera di a bin haya asina hopi hende ta sperando riba su yegada.  E ta contento di por a bin Aruba bek cu e corona.