Aruba tambe a briya na Acuril 2025 cu presentacion di LAB_Volume One

ORANJESTAD (AAN): Aruba a representa su herencia cultural den un manera sobresaliente durante Acuril 2025 na Corsou,

entre 9 y 12 di juni, tambe cu e presentacion di LAB_Volume One (Aruba’s Carnival History with a case study 2004–2008): un publicacion historico, consistiendo di dos buki den un cassette, dedica na preservacion di Aruba su cultura Carnival.     

            Acuril, Association of Caribbean University, Research and Institutional Libraries, ta un organisacion regional cu ta enfoca riba promocion di colaboracion y desaroyo entre bibliotecanan, archivonan y institucionnan educativo den Caribe. Aruba a tuma un paso significativo pa compara su herencia cultural den e evento aki. 

            Un par di siman prome di e conferencia, un idea a nace: pa cada un di e 24 paisnan participante ricibi un copia di LAB_Volume One pa hiba bek pa nan biblioteca, universidad of archivo nacional. Astrid Britten, directora di Biblioteca Nacional Aruba a wordo aborda cu e plan, y inmediatamente a duna su sosten, reconociendo e gran balor cultural y educativo di e publicacion.   

            For di e momento ey, e proyecto a gana sosten di Ministerio di Cultura y di Enseñansa, cu Departamento di Cultura. Mastercargo tambe a yuda pa asegura cu e carga importante aki por a yega na tempo te na porta di Acuril.

            Durante e ceremonia di clausura dia 12 di juni, despues di un discurso di Zetsia Ponson y Astrid Britten, tur 24 pais participante a ricibi nan propio copia di LAB_Volume One. E entrega a keda ricibi cu entusiasmo, y tur hende a keda hopi impresiona y contento cu e regalonan.

            E paisnan participante tabata entre otro: Curaçao, Guyana, Jamaica, Bahamas, Dominican Republic, Trinidad & Tobago, Puerto Rico, Haiti, Suriname, Barbados y Venezuela.

            Aruba a duna un ehempel di con cultura por wordo preserva y comparti riba un escala internacional, den un manera di orguyo y respet.