Aruba su edificio USA Departures lo bay bira 2 biaha mas grandi

Proyecto na Aeropuerto --ORANJESTAD (AAN): Diaranzon atardi, Ministro di Turismo Dangui Oduber hunto cu CEO di Aruba Airport Authority Joost Meijs, a topa cu prensa. 

Esey despues cu a duna e titular di turismo un tour di e proceso andando pa cu Fase 1-A di Gateway 2030 di Aeropuerto di Aruba.

   Esaki ta e prome site-visit di Ministro awor cu el a wordo re-eligi pa e titulo aki.

   E motibo pakico a bin cu e proyecto aki ta debi cu a bin nota cu Aruba su Aeropuerto ta birando chikito. E ta pone cu dado momento no tin suficiente espacio paden pa acomoda e cantidad di pasaheronan cu principalmente ta yega of sali riba Diasabra y Diadomingo.

   Gateway 2030 ta un proyecto di mas di 140 miyon Dollar cu a wordo prepara di algun aña pasa caba, y el a wordo para dado momento debi na e yegada di Pandemia di Covid-19.

   Diferente contratista local a uni, pa asina hunto nan bay ehecuta e proyecto aki.  Den bista di Ministro, esaki ta fenomenal como cu e ta garantiza cupo di trabao pa nos hendenan local, y tambe garantiza cu tur material lo wordo cumpra na Aruba mes.

   E calculo ta cu e lo genera entre 200 y 300 cupo di trabao sea directo of indirecto cu AAA. E proyecto aki lo crea un spin off economico pa pais Aruba y lo trece placa den caha di Gobierno atraves di impuesto. Ta un proyecto importante pa e ampliacion y renobacion di nos aeropuerto.

   Na April 2021 e proyecto a wordo anuncia oficialmente, y na Juni a start.  Segun planificacion e proyecto aki lo mester worde entrega na aña 2024.  Ora cu e wordo entrega completamente, e lo genera cuponan adicional di trabao.

   Minister Oduber a splica den e conferencia di prensa cu Fase 1-A ta encera un expansion di e Area di USA Departures su Check-in Hall, esaki lo bay bira 2 biaha mas grandi cu locual e ta na e momento aki.

   Tambe lo bay construi un “baggage hall” completamente nobo di tecnologia ultra moderno y sumamente sofistica.

   Segun e mandatario esaki lo ta un di e mihor sistema di conveyor processor pa maleta na mundo y sigur e miho den Caribe na momento cu e ta den funcion. Minister Oduber a menciona cu e ta un inversion basta cuantioso pero na momento cu e ta cla nos aeropuerto lo por ofrece un mihor servicio y experencia na nos bishitantenan. Minister a splica cu e inversion aki ta uno necesario mirando e proyeccionnan cu tin pa futuro. Ta proyecta cu Aruba lo sigui crece den cantidad di bishitante y si no haci e inversionnan necesario nos aeropuerto no por bay duna e servicio na nos bishitantenan cu nos ta desea.

   Aki por mira e espacio cu ya a wordo nivela y prepara pa cuminza cu fundeshi pa expande e USA Departures.