Aruba Lions agradecido cu Colegio San Augustin a duna un man

ORANJESTAD (AAN): Diasabra cu a pasa, Aruba Lions Club a tene su famoso “Health Fair 2025” cu pa prome biaha a ser teni Pariba di Brug.

   Semper esaki tabata socede na nan sede na Eagle na Playa, of tambe na espacio di Xavier University School of Medicine.

   Pero e biaha aki pa tin mihor acceso pa comunidad di San Nicolas y becindario, nan mester a busca un lugar na San Nicolas pa haci esaki.  Esey ta unda cu Colegio San Augustin a ofrece nan lokaalnan pa asina haci esaki.  E ta algo positivo toch pa comunidad di San Nicolas, y di henter Aruba.

   Director Jeffrey Kelly di Colegio San Augustin na San Nicolas ta contento di por a coopera cu Aruba Lions Club.  Aruba Lions a haci entrega di un regalo tambe na e scol pa e bon cooperacion.