ORANJESTAD (AAN): Un momento special a tuma lugar recientemente na Aruba Bank su sucursal principal pa anuncia
e colaboracion entre Aruba Bank y Arubaanse Voetbal Bond pa sostene e programa Talent Development Scheme (TDS) di AVB, cu lo wordo guia pa Chris Beardsley, FIFA Talent Coach. Como partner, Aruba Bank ta reconoce e importancia di inverti no solamente den e presente, pero tambe den e futuro di excelencia y innovacion den futbol mundial pa nos hobennan.
E colaboracion aki ta un muestra di e compromiso di Aruba Bank pa sigi desaroya e futuronan estelar di futbol di Aruba.
E programa TDS di AVB, ta un iniciativa pa forma e futuro di futbol di Aruba door di stimula e potencial di hobennan talentoso. Aruba Bank ta reconoce e importancia di inverti den deporte.
Aruba Bank ta aporta cu un contribucion financiero di AWG 23,328 pa e programa TDS di AVB. Esaki ta subraya nan dedicacion na crecemento y desaroyo di talento futbolistico di Aruba.
Como patrocinador, e logo di Aruba Bank lo ta cu orguyo ariba e uniformnan di entrenamento di tur hungadornan. E representacion visual aki ta mustra e compromiso di e banco pa stimula talento y contribui na e elevacion di futbol di Aruba tanto na nivel nacional como internacional.
Aruba Bank ta extende gratitud na Arubaanse Voetbal Bond pa e oportunidad aki. Hunto nos ta construi un exito pa futbol di Aruba.
