Aruba Bank su Gran Evento ‘This is MEGA’: Un biaha mas tabata un exito!

ORANJESTAD (AAN):  Un biaha mas Aruba Bank a surpasa tur expectativa cu su ‘This is MEGA’ Car Sales Campaign & Event,

e campaña y evento di benta di auto di mas grandi di Aruba. MEGA a atrae hopi cliente existente y cliente nobo cu tabata entusiasma cu e oferta di Aruba Bank, cu ta inclui entre otro e beneficio di cumpra un auto NOBO y cuminsa paga te na Maart 2025.

            For di momento cu e campaña y evento a ser anuncia, Aruba Bank a experencia un entusiasmo grandi cerca e diferente agencianan di auto na Aruba. Asina cu a activa e promocion pa e campaña, clientenan mesora a cuminsa bishita e dealers nan y tambe Aruba Bank mes, pa asina realisa e auto di nan soño.

            Otro beneficionan di e campaña tabata entre otro, aprobacion pa prestamo cu “0” downpayment y interes reduci di solamente 5.00 – 5.25% (interes efectivo a varia entre 5.12% y 5.38%). Diferente cliente tambe a scoge pa extende nan periodo di prestamo te cu seis of shete aña pa asina haci posibel pa nan cumpra e auto di nan soño y toch yega na un quota mensual cu ta conveniente.

            Aruba Bank ta manda un “danki” na tur bishitante cu a sostene Rotaract door di cumpra cuminda of bebida, asina yudando nan yega na fondonan pa cumpli cu nan metanan di brinda yudansa den nos comunidad.

            Aruba Bank ta gradici tur car dealers, sin lubida e ekipo grandi di empleadonan cu a traha den preparacion y durante e evento, y sigur e comunidad di Aruba pa a scoge Aruba Bank como nan banco pa por a realisa nan auto NOBO. Ta un placer pa brinda servicio y productonan na comunidad y di e forma aki yuda clientenan logra nan metanan.