Aruba Bank a firma un MOU pa sostene Plan Nacional di Reforestacion 2025–2030

ORANJESTAD (AAN): Aruba Bank N.V. a firma un Memorandum of Understanding (MOU) cu e Gobierno di Aruba pa participa den e Plan Nacional di Reforestacion 2025–2030, conoci como Sembra Speranza.

    E MOU ta representa un compromiso compartí pa cuido di medio ambiente, sostenibilidad, y e bienestar a largo plazo di Aruba. Pa medio di e colaboracion aki, Aruba Bank ta expresa su intencion pa voluntariamente adopta y sostenee reforestacion di un terreno designa, contribuyendo na restauracion di mata nativo, fortaleciendo resiliencia ecologico, y mehorando calidad di bida riba nos isla.

    E acuerdo a wordo firma na nomber di Aruba Bank pa Señora Edseline Leer-Semeleer, Head of Retail Banking. “Nos ta orguyoso di por contribui na un iniciativa nacional cu ta proteha nos medio ambiente pa e generacion actual y futuro,” segun Señora Leer-Semeleer. “E colaboracion aki ta totalmente alinea cu e pilar We Care di Aruba Bank, cu ta refleha nos compromiso pa cuida nos comunidad, nos isla y e futuro cu nos ta construyendo hunto.”

    E Plan Nacional di Reforestacion ta invita partnernan di sector priva pa hunga un rol activo den restauracion y mantenimiento di terenonan di reforestacion, den colaboracion cu instancianan di gobierno. Participacion di Aruba Bank ta mustra su conviccion cu impacto duradero ta logra ora organizacionnan ta traha hunto pa e bienestar comun.