Aruba Airport Authority ta expande segmento y mercado nobo di negoshi

ORANJESTAD (AAN):  JET-TNCA como e unico fixed based operator na Aruba, maneha pa Aruba Airport Authority N.V, recientemente a haci un cantidad di bishita exitoso na aeropuertonan priva na Miami y New York.

            E bishitanan tabata dirigi pa Jo-Anne Meaux-Arends, Aviation Business Development Executive, compaña pa FBO Operations Manager, Minerva Flemming y Aviation Business Development Research and Development officer, Joanne Trimon.

            Aruba Airport Authority, pionero den e industria di aviacion, a fiha su mirada den expande na diferente segmento nobo y emocionante di negoshi. E paso strategico aki tin como meta pa capitalisa e oportunidadnan cu presenta, diversifica e fluho di ingreso y consolida e autoridad su posicion como un leading player den e mercado global.

            E obhetivo principal tras di e reunionnan aki tabata pa presenta e team di JET-TNCA, desaroya e relacionnan di colaboracion cu socionan strategico pa accede na nan experiencia- y recursonan y pa explora y propone idea innovativo di asociacion delinea cu nan mision di expande nan presencia den e mercadonan di Merca y Latino America.

            Durante e site visits, e team di JET-TNCA tabatin e oportunidad di interactua cu varios Executive Airports den e industria di aviacion comercial na Merca, manera Banyan Air Service, Fontainebleau Aviation, Million Air, Meridian Air Charter y Atlantic Aviation, facilitando discusion profundo tocante diferente tema relaciona cu e crecemento empresarial y e oportunidadnan den e mercado.

            Algun tema di discusion tabata e business models, partnership strategico y e plannan di expansion pa e region di Merca. Ademas, e tema di presencia di autoridad Mericano na e aeropuerto di Aruba, esta CBP Preclearance and services a genera basta interes, destacando e importancia di e procesonan simplifica pa e biaheronan internacional den e industria di business aviation.

            E participacion di JET-TNCA den e HQ visits a marca un paso significativo pa mehora su posicion den e industria di aviacion den Caribe, reenforsando su compromiso cu planificacion y entrega di meta exitoso.