Aruba a ricibi 100.770 turista den luna di Augustus locual ta significa un recuperacion di 105%

Minister Dangui Oduber:

*Cifranan ta surpasa esunnan di 2019 

ORANJESTAD (AAN):   Minister di Turismo y Salud Publico Dangui Oduber, durante un rueda di prensa dialuna mainta a duna di conoce cu siman pasa a ricibi e resultadonan relaciona cu e cantidad di turista cu a bishita Aruba durante luna di Augustus.

            E mandatario a haya importante pa comparti e resultadonan cu comunidad. Den luna di Januari a habri aña den pleno pandemia y Ministerio di Turismo hunto cu socionan a fiha un strategia (Exit Strategy) cu enfoke riba recuperacion di turismo pa por yega bek na nivelnan di aña 2019 y purba surpasa esaki.

            El a agrega cu despues di 8 luna por ta satisfecho cu e resultadonan. Turismo ta recuperando positivamente. Ya caba den e ultimo 5 lunanan consecutivamente, no solamente a yega bek na e nivelnan di 2019, pero te hasta a surpasa e nivelnan di 2019, cual sigur ta remarcabel despues di 2 aña hopi dificil.

            Gradualmente a keda crece te na e momentonan aki cu ya caba a yega bek na e nivelnan di 2019, sino cu ta surpasando e nivelnan aki caba.

            Den luna di Augustus, Aruba a ricibi 100.770 turista cu ta significa un recuperacion di 105% den comparacion cu Augustus 2019. A habri aña 2022 hopi slow pa motivo di e variante Omicron. E recuperacion di e luna di Januari tabata solamente 63% pa motivo di e pandemia tambe.

            Den luna di Februari ya caba a cuminsa 'pick-up' un poco y a bay na 84%. Na Maart a subi te na 90%, na April 108%, Mei 103%, Juni 103%, Juli 105% y na Augustus 105%.

            Pa loke ta e recuperacion di e mercado mas importante cu ta e mercado mericano, esaki ta desaroya hopi bon y ya caba den luna di Februari casi a yega na nivelnan di aña 2019 y entrante luna di April (114%) te cu luna di Augustus (110%), por mira un recuperacion excelente.

            Esaki ta un bon noticia teniendo cuenta cu e mercado mericano ta keda e mercado di mas importante pa turismo di Aruba, Minister Oduber a remarca.