Aruba a haya cuatro unidad nobo di Ambulans

Inversion di 3.2 miyon Florin di AZV

• Dos Ambulans normal y dos Ambulans cu ta big-box
• Deseo pa den futuro cercano cu 911 lo cay bao ImSan tambe 

ORANJESTAD (AAN): Diaranson atardi durante un ceremonia net na entrada di ImSan na San Nicolas, a tuma lugar entrega oficial di cuatro unidad nobo di Ambulans pa Aruba.   Ta trata aki di dos Ambulans cu ta riba e plataforma di un Ford Transit.  Tambe dos Ambulans mas grandi (big-box) cu ta riba e plataforma di un Ford F350.

    Di hopi tempo caba tin indicacion cu algun Ambulans cu tin riba e isla, nan “tempo a yega” y ta yorando pa busca nobo.  Sinembargo debi na e Pandemia di Covid-19 y e scarcedad di material rond mundo, esey a inclui tambe scarcedad enorme den produccion di unidadnan di Ambulans.

   Na prome instante, Aruba a djis manda busca dos unidad di Ambulans riba e chassis di un Ford Transit.  Pero despues via di contacto cu un experto na Curaçao, a logra haya adres di fabrica cu ta crea Ambulans mas grandi.  A busca extra fondo y asina e decision final a cay cu ta busca 2 Ambulans ‘normal’, y 2 Ambulans ‘grandi’.

   Tur cuatro unidad tabata staciona dilanti ImSan, na momento cu Director Dr. Joel Rajnherc a anuncia su satisfaccion di a ricibi cooperacion inmenso di AZV pa asina por a adkiri e cuatro piezanan aki importante den e circulo di salubridad publico na Aruba.

   Dr. Rajnherc a mustra riba e importancia cu e personal di Ambulans ta keda haya ‘bijscholing’ pa nan keda up-to-date.  El a divulga cu tin 8 chauffeur nobo cu fin di aña ta cla pa drenta den servicio, pero nan ta hayando ainda les pa ta asistente tambe di e enfermeronan abordo.  El a gradici tambe tur personal di Ambulans pa tur nan esfuerzo pa sigui duna mihor servicio posibel, apesar di hopi reto nobo cu tin.

   Deseo pa 911 parti medico cay bao ImSan: Algo cu e Director di ImSan a revela durante e atardi aki, ta dos deseo grandi cu e tin ainda pa e servicio di Ambulans.

   Esey ta pa pone e central di alarma di 911 cu ta atende emergencia medico (“medische noodzaak”) cay bao di liderato y personal di Ambulans.  Ta asina cu Gobierno actual a start cu un comision cu a keda encarga pa studia e posibilidad aki di schuif 911 bao di ImSan y Ambulans, y e ta spera cu e caso aki por keda wordo atendi keto bay y ta cay bao categoria di “lopende zaken”.

   Ademas di esaki, Director di ImSan a indica cu pa hopi aña caba ta tratando di realiza un empoderamento legal riba esnan trahando como enfermero riba Ambulans, e derechonan necesario pa ehecuta nan funcion di un manera moderno conforme nan educacion.  Personal di Ambulans na Aruba tin e habilidad y conocemento caba, pero ainda falta e autoridad legal huridicamente cu nan por tuma decisionnan riba nan mes, y ImSan ta spera cu esaki lo por bay bira realidad.

   Ministro Dangui Oduber a menciona e.o. e sumanan cu Gobierno a inverti pa asina por a haci ImSan haya un funcion como Hospital, y awor cu e extra 3.2 miyon Florin aki inverti den unidadnan di Ambulans, por mira cu ta haciendo tur cos pa mehora cuido medico na Aruba.

   Despues di entrega di yabi na Ministro, a pasa esaki over pa Liberato Hoek di Ambulans, kende e ora a laga personal di Ambulans start tur cuatro Ambulans di marca Ford, y e sonido di motor potente a keda resona eynan, y e sirena ta esnan cu ta sona duro.