Minister Ursell Arends:
ORANJESTAD (AAN): Recientemente Aruba a firma un acuerdo bilateral (MoU) cu Reino Uni di Gran Bretania y Irlanda di Norte.
Esaki a wordo firma entre Directie Luchtvaart Aruba y e autoridad di aviacion civil di Reino Uni. Aki ta trata di un MoU relaciona cu transporte aereo cu ta regula derechonan di transporte aereo di e aerolineanan di ambos pais riba e rutanan entre ambos pais.
E acuerdo ta segun e principionan di 'open skies', cu ta un maneho liberal sin restriccion y limitacion pa loke ta capacidad y frequencia di vuelonan.
E maneho aki ta esun di mas efectivo pa maximalisa airlift, cual ta hopi importante pa Aruba su turismo. Tambe ta importante pa remarca cu e acuerdo firma ta habri porta pa vuelonan directo entre Aruba y Reino Uni, di cual dia 26 di maart 2023, British Airways lo efectua su prome vuelo entre London Gatwick y Aruba.
Siguientemente Aruba lo sigui e proceso cu e autoridadnan di Reino Unido pa converti e acuerdo aki den un tratado.
E acuerdo aki ta forma parti di e strategia di Ministerio di Transporte pa sigui expande Aruba su infrastructura di acuerdonan bilateral di transporte aereo, pa asina crea mas posibilidad pa airlift y conexion, cu di su parti lo genera y stimula desaroyo economico.
