Artistanan caribense ta lansa produccion nobo 'Mijn Only'

WILLEMSTAD – Pa prome biaha dos titan di musica caribense na Hulanda, Stanley Clementina y Jayh Jawson, ta uni forza den un colaboracion maestral titula ‘Mijn Only’.

E cantica ta un declaracion di amor na e persona special den nos bida, unda ta exalta su valor incomparabel despues di a conkista tur reto y prueba. 

Stanley Clementina y Jayh Jawson tin un amistad di basta aña, unda semper nan por filosofia di bida y alavez dialoga riba desaroyonan den e industria di musica. Anteriormente, e dos artistanan nunca a colabora cu otro como vocalista, pero esey a cambia cu ‘Mijn Only’. 

Porfin a yega e momento pa deleita cu un colaboracion unda tur dos su estilo musical ta keda combina. Si Stanley a aregla y produci diferente cantica pa Jayh, cual lo keda lansa de futuro cercano. Aña pasa, Jayh a saca ‘Wowo Sera’, e prome hit di diferente produccion cu nan a colabora riba dje.

Stanley ya a establece su mes como un pionero di compa na papiamento y ta conoci pa su produccionnan cu diferente artista den e genero di Afro Beat. Na 2021, Stanley a drenta den studio cu artistanan hulandes conoci manera Ronny Flex y Jonna Fraser y asta gana un ‘Gouden Award’ cu Frenna pa su cantica ‘Ghetto Youth’. Tambe Stanley a produci ‘Curaçao ta dushi’ y tambe ‘Deep Down’ pa e banda K’Ribe.

Na maart di 2021, den un intento pa tene tur hende anima durante e ‘lockdown’ causa pa e pandemia di COVID-19, Stanley y varios amigo musico a haci un presentacion virtual titula Trans-Atlantic Connection’. 

Colaboracion cu Jayh Jawson

Cantante Jayh Jawson ta conoci pa su estilo sensual y romantico, unda e ta combina R&B, Hip Hop y musica caribense. Pa mas cu un decada, Jayh ta deleitando nos cu varios hit entre otro ‘Mijn Baby’, ‘Mooie Dag’, y ‘Volgende Stap’. Na 2011, Jayh ta firma cu label hulandes Top Notch y ta debuta su prome album titula ‘Jayh Jawson’.  

Na 2014, Jayh ta lansa su propio label Avalon cu su rumannan y ta firma diferente artista manera Zefanio. Tambe Jayh ta sigui traha su mes produccionnan manera ‘Ik heb Je’, ‘Hoe laat’ y e mega hit ‘Ballon’ cu Broederliefde. 

Tabata un reto agradabel pa Stanley combina e estilo romantico di R&B cu Jayh ta conoci p’e, hunto cu e ritmo melodico y sensual di Compa. Stanley a sera su mes den su studio y despues di algun tempo, a manda e cantica pa Jayh.           

Stanley ta atmiti di tabata yen di anticipacion, ya cu Jayh por ta critico ora e ke crea bon musica. Pero Jayh a gusta e melodia y areglo di ‘Mijn Only’ mesora y hunto, Stanley cu Jayh a caba e texto di e cantica.

E resultado final ta un homenage na amor berdadero, perfecto pa tur namorado. “Pami ta un honor pa colabora cu un bon amigo, cu alavez ta considera e ‘Godfather’ di musica urbano caribense na Hulanda,’ Stanley a declara finalmente.