Artista Gustave Nouel di Aruba awor ta hopi activo na Indonesia

ORANJESTAD (AAN): E conocido Gustave Nouel, e artista di Aruba internacionalmente reconoci desde siglo pasa,

actualmente ta na Indonesia pa ofrece y promove su famoso workshop di 'Rembrandt selfportrait'.

   Organización di e proyecto ta den man di Gustave su representante na Indonesia, Greis Koagow. A logra varios oferta pa su 'Rembrandt' workshop, den técnica universal y simpel di 'street-art' y tambe pa su performance di pintura.

   Tin hasta posibilidad pa Gustave establece su mes na Bali pa algun aña a ser ofreci pa un proyecto di arte artistico educativo.  Tambe a logra invitacion importante pa tanto exposicion colectivo como individual, na Bali.

   Señora Mi Komang Artini (Unidad di Relacion Publico y Cooperacion), coordinadora na Bali dje Facultad di Arte na Denpasar (ISI 'Academia di Arte'), a mustra gran interes pa organiza e 'performance di pintura' y workshop inspira pa 'Rembrandt' dje pintor Arubano, y hasta a invita Gustave Nouel pa participa den un gran exposicion colectivo internacional cu e facultad di Arte ta organizando pa 2025 na Bali.

   Sr. Ketot Kariasa, curador di museo ARMA (e museo mas importante di Bali), tambe a mustra gran interes pa organiza e workshop y performance, inspira pa 'Rembrandt', den tecnicas simpel y universal di "street-art". el a propone un exposicion individual grandi individual di Gustave Nouel na 2025 na Museo ARMA. E museo lo cubri tur gasto pa trece pinturanan y artista di Aruba Gustave Nouel for di Hulanda pa workshops durante a lo menos un luna na Museo ARMA. Intencion ta tambe pa agrega pintura di Gustave na e colection internacional di Museo ARMA.