Diamars sin produccion
ORANJESTAD (AAN): E siman aki, na altura di e Substation di NV Elmar cu tin na Sabana Blanco tabatin trabao andando, unda cu un Contratista ta haciendo trabao pa realoca diferente kabel cu tin eybanda bao di tera.
Sinembargo alrededor di 1:40 pm, trahador di Contratista pa ekibocacion a dal e kabel principal cu ta transmiti coriente na un gran parti di Oranjestad. E kabelnan aki cu ta bao presion di azeta, mesora a benta e linea aki abao, y un gran parti di Playa a keda sin coriente, e.o. parti di Klip, Lagoenweg, Beatrixstraat, Irenestraat, Compleho Deportivo Guillermo P. Trinidad, Wilhelminastraat, Havenstraat, Paardenbaaistraat, Edificio di Dimas, parti di Renaissance Resort, Marketplace, oficina di Gobierno, Schelpstraat, centro di Oranjestad, parti di Solito, parti di Eagle, Post Aruba NV, Belgiestraat, Madiki, Arendsstraat, Engelandstraat, Frankrijkstraat, Driemasterstraat, y hopi area mas.
Net e ora ey tabatin dos barco crusero, esta Carnival Mardi Gras y tambe Carnival Horzon den waf cu miles di turista riba pia, y cu mester a sali for di tiendanan cu a bira scur, y comerciante a haye obliga di cera porta como cu no por a procesa ningun pago di credit card.
E prome tarea di personal di NV Elmar ta pa identifica e problema. Unavez cu nan a haya sa e origen di e problema, a dicidi na cuminza isola e area, y trata na cambia e load di coriente pa otro kabelnan. Asina ey ya caba pa 2:10 pm, nan a logra duna parti di Schelpstraat, oficina di Gobierno, Renaissance Resort, y Windcreek Casino y vecindario coriente bek. Pa 2:20 pm a sigui cu e proceso di ‘Shift Load’ pa sigui duna coriente na areanan afecta.
Lamentablemente den e proceso ey, pa 2:45 pm e compania a haye obliga na corta coriente temporalmente pa Punta Brabo, pa transferi e carga via di un otro Substation.
Pa 3:05 pm, e suministro di coriente a wordo restableci pa area di Eagle y vecindario. Pa 3:13 pm a duna coriente bek na edificio di Dimas y vecindario. Pa 3:18 pm a duna coriente bek na Solito y vecindario.
Pa 4:09 pm ya tur area di Eagle a haya coriente bek, y e ora ta sigui focus pa por duna coriente na otro parti. Pa 4:30 pm a duna coriente na Lagoenweg (conoci como Caya Ernesto Harms). Pa 4:54 pm a duna coriente na parti di Klip.
Finalmente te 5:30 pm, coriente a bin bek pa tur area cu a wordo afecta pa e problema di coriente aki.
