APEX a celebra aniversario di 11 empleado

E caranan leal tras di e miho concrete di Aruba

ORANJESTAD (AAN): Den un ambiente ameno empleadonan di APEX, compania cu antes tabata yama ATCO Concrete Products, a bini hunto pa celebra aniversario di no menos cu 11 diferente empleado. E compania ta conoci pa ta conta cu empleadonan cu ta forma un carera eyden y ta traha practicamente henter nan bida.

            E hubilarionan ta Reme Tromp cu na aña 2020 a cumpli 20 aña di servicio cu e compania. Gina Flores e aña aki a celebra 20 aña di servicio fiel na APEX. Tambe a celebra e echo cu na aña 2020, e grupo di empleadonan Izaira Vrolijk, Anthony Martinus y Vivian Lee a cumpli 25 aña trahando na APEX. Di otro banda, Elias Camara de Freitas y Edwin Diaz a recorda cu aña pasa nan a cumpli 25 aña di servicio. Rito Geerman y Fernando Lewis a celebra cu e aña aki ta celebra nan 25 aniversario cu compania. Na aña 2020 Victor Thiel a recorda e echo cu e tin 30 aña trahando. Finalmente, Judith Vingal a records na 2021 cu e tin no menos cu 35 aña den servicio di APEX.

            Pa dos aña largo, durante pandemia, APEX no por a celebra e aniversarionan den forma grandi cu e empleadonan. Elizabeth Krozendijk, coordinador di recurso humano, a indica cu a reconoce tur empleado cu a celebra nan aniversario den e periodo di 2020 pa 2022. Un total di diesun empleado a celebra entre binti y binticinco aña di aniversario, tambe tabatin esunnan cu a cumpli trinta y trinticinco aña cu e compania APEX.

            Den nomber di gerencia di APEX, Richard de Veer a gradici tur empleado pa nan dedicacion, lealtad n’e compania y a gradici nan famia cu durante e añanan di servicio semper tabata t’ey pa nan. APEX ta sigui conta cu nan sosten, esfuerso y dedicacion den e añanan cu ta bin.