Apesar di temponan dificil Super Shopping ta sigui kere den apoyo di pueblo di Aruba

ORANJESTAD (AAN): DIARIO recientemente a entrevista propietario di Super Shopping Naresh Kanal, pa haya sa di historia di e negoshi.

Kanal a splica cu el a biba prome na Corsow cu su famia y na 1988 nan a habri un negoshi chikito den Caya Grandi yama Sagar.

“E negoshi aki Super Shopping antes tabata New Hong Kong Store y ora cu nan a cera e negoshi nos a huur esaki pa habri un mercado chikito pa bende paña na 1989”.

Despues nos a sigui crece tiki tiki cu e apoyo di pueblo di Aruba, segun Kanal.

El a splica cu na 1999 nan a muda por completo di Corsow pa haci Aruba nan cas y nos a cera tur nos negoshinan na Corsow.

“Awor nos ta Arubiano bibando na Aruba danki Dios”.

Despues di 1999 mi a haci e negoshi mas grandi y na dado momento nos a cumpra un propiedad patras di Brenchi’s y nos a hacie un tiki mas grandi.

Nos a cumpra tambe otro tereno cu tabata bashi y nos hacie mas grandi, mientras cu awor nos tin otro tereno tambe cu otro aña ta bay haci e tienda mas grandi, segun propietario di Super Shopping.

Kanal a gradici pueblo di Aruba pa e confianza y el a indica cu e lo sigui haci su best pa duna bon servicio,  bende articulonan na bon prijs y bin cu mercancia di bon calidad.

DIARIO a puntra e comerciante si den comienzo e tabata tin mas socio, of si tabata un negoshi di famia so.

Kanal a splica cu principalmente e negoshi tabata y ta e y su casa so y nan tin managers cu a bin for di India pa yuda nan den e negoshi for di tempo cu nan tabata estableci na Corsow.

El a bisa tambe cu awor e tin 23 persona ta traha den su negoshi, di cual mayoria ta Arubiano.

Esaki ta inclui hendenan cu tin mas cu 27 aña den servicio caba.

“Nos negoshi di 32 aña ta un Department Store unda cu bo por haya tur cos bao di un solo dak”, Kanal a bisa di Super Shopping.

E idea pa bin Aruba a nace ora cu Kanal a bishita nos isla y a ripara cu na Aruba no tabata tin un tipo di negoshi asina.

Pesey a dicidi poco poco pa busca un manera pa habri un negoshi na Aruba y asina a habri Sagar prome.

Despues cu a habri Super Shopping a habri Sagar 2 y despues Simply Shoes.

Ora cu na 2015 un candela a destrui e edificio di Simply Shoes y mirando cu Caya Grandi a bira hopi dificil ora cu mester a haci trabaonan di construccion pa bin cu e Tram, e comerciante a mantene solamente Sagar 2 y Super Shopping habri.

DIARIO a puntra Kanal con e ta mira e situacion actual den comercio, compara cu antes y el a indica cu e ta un tiki dificil compara cu antes, pero e tin confianza den e hecho cu Aruba lo recupera.

Esaki apesar di e hecho cu na 2020 venta a baha cu entre 35 cu 40%.

El a splica si cu na 2021 venta a subi bek un tiki, pero un parti dificil ta keda cu tur caminda na mundo prijs di mercancia ta subi.