Apertura oficial di localidad nobo di Departamento di Hoben y Mucha

Un momento hopi special pa Prome Minister:

ORANJESTAD (AAN) – Despues di un trayectoria largo, Diabierna 1 di November, pa 4.30 or di atardi, a tuma lugar e apertura oficial di e localidad nobo di e Departamento di Hoben y Mucha, situa na Sero Blanco 17, cu presencia di Prome Minister Evelyn Wever-Croes, e personal di DHM, varios Minister y Parlamentario, e lider di Plan di Mayor, Michella Steenvoorde-Lacle, y Directora Sue-Ann, Lider di Codigo di Proteccion.

            Prome Minister a expresa cu esaki tabata un momento hopi special, unda cu e Departamento di Mucha y Hoben a haya un structura, a haya su cas, e lugar for di cual ta bay duna e ayudo y sosten, cu asina tanto tin mester aki na Aruba.

            E dignatario a trece dilanti, cayendo bek den tempo, cu DMH ta, literalmente, un di e aspectonan cu ta forma parti di e Social Crisis Plan, cu a inicia na final di aña 2018, unda Aruba tabata den un situacion hopi dificil, unda prome minister a recorda e caso tristo di e dos muchanan cu a muri na aña 2017.

            Esey a pone cu despues di e momento ey no tabata tin discusion na Aruba mas, cu e problemanan social na Aruba mester a wordo atendi na forma no tradicional, y asina bao mandato di minister Glenbert e momento ey, di Gabinete Wever-Croes 1, a cuminza desaroya e Crisis Plan, y Gobierno a aloca fondo pa e plan social aki, den temponan financieramente, hopi dificil, loke ta haci’e algo hopi excepcional.

            Minister Presidente a señala cu e proyecto aki a wordo concretiza bao maneho di Minister Rocco Tjon, den Gabinete Wever-Croes 2, cu a kere den e proyecto y a sigui cu ne, y Diabierna tabata den e momento cu por a celebra realmente, cu structuralmente Aruba tin un departamento cu ta atende cu nos mucha y hobennan.

            Den e siguiente edicion, DIARIO lo elabora mas tocante e evento aki.