Apertura di exposicion "Nos Hende" di e fotografo reconoci Rob Vermeer

ORANJESTAD (AAN):  Diaranson na Censo a tuma lugar e apertura di exposicion "Nos Hende" di e fotografo reconoci Sr. Rob Vermeer.

Un homenahe na tur hende cu ta sinti su mes un Arubiano, cu ta stima Aruba, y cu den mas di un ocasion a bay Censo pa un of otro documento.

Rob Vermeer y señora Marjorie Vermeer ta hopi conoci pa e pueblo di Aruba,  desde su epoca di Checkpoint Color den Columbusstraat na Playa. Te awe, Checkpoint Color ta ofrece servicio di fotografia.

Directora di Censo, Sharin Luydens a habri e exposicion contando con señora Marjorie a acerca Censo pa e gran proyecto  aki, y cu tabata algo cu nan a apoya di biaha.

Señor Leon M. Bérénos, chroniqueur y historicus a duna palabra y conta anecdotanan di su 63 aña di amistad cu Rob Vermeer.

Marjorie Vermeer y Natusha Croes tambe a hiba palabra di agradecimento pa e cooperacion cu nan a haya. 

E exposicion "NOS HENDE ", ta recoleccion di diferente cara nan Arubiano, lo keda pa tres luna den edificio di Censo. DIARIO ta felicita henter e organizacion.