Apertura di e di 19 edicion di Expo “E Lens di mi wowonan” a keda realiza Dialuna anochi

ORANJESTAD (AAN): Dialuna 2 di September, a tuma lugar na Biblioteca Nacional, e apertura di e di 19 edicion di exposicion di potret di prensa “E Lens di mi wowonan”,

cual ta un iniciativa di e colega Leo Vrolijk, pa reconoce e trabao di prensa na Aruba.

Leo Vrolijk a duna inicio na e ceremonia hibando palabra na un manera espontaneo, pasobra e no gusta lesa palabra riba papel pa papia den publico.

El a gradici un y tur cu a yud’e organiza e expo aki, cu ta di gran balor pa su persona, y el a comenta cu el a baha cu  pensioen na Mei ultimo, pero e no por a mira cu tin consecuencia tambe cu ne, pero e ta spera cu e lo recupera pronto.

“E aña aki, deporte a sobresali den e expo, aunke mi sa cu deporte na Aruba a sobresali tur caminda. Esey danki na e fotografonan cu tin ongeveer mas di 235 potret, y tin mas of menos 24 fotografo cu tin 35 potret di Stichting Rancho cu a celebra 200 aña di Oranjestad, y tambe Biblioteca cu a caba di cumpli 75 aña. Danki pa tur cos y welcome”, Leo Vrolijk a conclui.

Seguidamente, Pierre Rafini, director di RBC Royal Bank Aruba NV, a hiba palabra y a menciona cu esaki ta e di 19 edicion pero cu en realidad lo mester tabata e di 21, si nos corda di e temporada di Covid-19 cu tabata hopi dificil y e expo no por a tuma lugar durante dos aña.

“Pero nos ta contento cu e tey bek pa acompaña bosonan pero tambe Leo y tur e miembronan di prensa”, Rafini a expresa, y alavez felicita y desea tur miembro di prensa un feliz Dia di Prensa. El a cu esaki ta un dia pa conmemora, pasobra bisa enberdad prensa tin un tarea hopi importante y tambe un funcion pa mantene nos hendenan bon informa di tur loke ta pasa den nos comunidad, y tambe riba tereno internacional. “Esey ta tuma hopi curashi, dedicacion y tambe profesionalismo. Masha danki pa tur e trabao duro cu boso ta haci, na tur e miembronan di prensa”, Rafini a resalta.

El a sigui bisa cu desde e inicio di e exposicion aki, 21 aña pasa RBC ta e sponsor principal di e exposicion aki. “Pa RBC e ta un muestra cardinal di nos sosten na e trabao cu prensa a bin ta haci den nos comunidad, y nos como RBC ta hopi orguyoso di e aporte aki. Pa nos, e Lens di mi wowonan ta un exposicion cu ta e muestra di e trabao y identificacion di e trabao cu prensa ta bin ta haci, na un manera hopi bunita, cu ta expone prensa na su trabao diario. Nos ta felicita Leo Vrolijk pero tambe señora Rona Dijkhoff, cu ta su man drechi pa hopi aña den e proyecto aki”, señor Pierre Rafini a relata.