Aña 2024 ta bay ta un aña cu hopi reto

Minister Geoffrey Wever:

*E enfoke ta bay keda Oranjestad y San Nicolas. 

ORANJESTAD (AAN):  Aña 2024 ta bay ta un aña hopi druk. Asina Minister Geoffrey Wever a duna di conoce. Na december, 2023, presupuesto a wordo aproba y ta cla ta cuminsa cu proyectonan y continua cu loke a cuminsa caba, a bisa.

            Ta bay ta un aña cu hopi reto, pero cu hopi trabao caminda lo trece cambionan concreto pa e comunidad, Minister Wever a indica.         

            E aña aki lo continua cu e trabaonan den Oranjestad y den San Nicolas. Pa San Nicolas lo bira un aña importante. Fin di aña a haci e prome compra cu e mandatario a priminti pa San Nicolas.

            Algun luna pasa Parlamento a aproba rond di 1 miyon florin extra pa por a inverti 500 mil den Oranjestad y 500 mil den San Nicolas. E fondonan a wordo uza. A haci e prome compra pa e proyecto grandi cu kier desaroya.

            Tambe a rond af e di dos fase pa loke ta Wilhelminastraat cu ta bay bin. Parti di e parkeerplaats di Lagoen. Esey tambe a keda cla cu destaho y cu contratista. Esey ta trabaonan cu ta bay cuminsa wordo ehecuta awor caba y cu tin hopi preparacion a tuma lugar den aña 2023, Wever a señala.

            Aworaki ta wak cu e proyectonan aki ta birando un realidad y esey ta bay cu trabaonan cu ta cuminsa awor cu aña a habri.

            E enfoke ta bay keda Oranjestad y San Nicolas.

            Banda di esaki ta bay tin diferente biahe. Ta bay tin un 'investment summit' na Hulanda. Ta bayendo Brussels cu Union Europeo. Ta bay tin diferente trabao ariba tereno internacional pa trece mas mercadonan na Aruba como destinacion di inversion y cu ta yuda logra metanan manera e implementacion di desaroyo sostenibel, haci Aruba mas resiliente y desaroya centro di ciudad, Minister Wever a bisa.