Ainda por sigui yuda cu colect di comestibel na beneficio di comunidad

Fenomenal iniciativa na Colegio San Antonio

ORANJESTAD (AAN): Den fin di siman, alumnonan di Colegio San Antonio MAVO na Santa Cruz a colabora pa asina yuda den un campaña pa recauda comestible pa yuda esnan den necesidad.

   Bao guia di docentenan, alumnonan di Ciclo Avansa 1 y 2 a organizando un “Drive-by” pa colecta comestibel.

   Fundacion pa Comunidad Aruba y Ayudo Parokial Sta. Cruz ta conta cu nan aporte. Yuda nos, yuda nan.

   For di 10’or di mainta te cu 2’or di atardi, e alumnonan a para dilanti scol cu pancarta pa asina stimula chauffeurnan pa trece comestible pa yuda.  Esaki ta inclui cuminda den bleki, manera tuna, bonchi, fruta, sausage, y tur cos mas.

   Tambe tabata pidi pa bin cu saconan di bonchi, mashed potato, pasta, aroz, Harina PAN, funchi, coffie, lechi, salu cu sucu, y mas.

   Aunke awacero tabata menaza, toch nan a keda impresiona cu e yudansa di pueblo cu a trece comestibel.

   Nan ta manda palabra di danki na tur cu a pasa y haci nan contribucion!  Tur e cuminda treci sigur lo haci hopi famia contento.  Na tur esnan cu no a haya chens di pasa Diasabra, specialmente nos mesun alumnonan, por sigui trece comestibel henter  e siman aki na Colegio San Antonio na Santa Cruz.

   Sigur hopi danki ta bay na e alumnonan di CA1, CA2 y docentenan BT, GM y GA cu a tuma e iniciativa. Danki na tur otro docente cu a yuda tambe.