Ainda no tin un solucion structural pa e tereno di fornu di calki na Rancho

*Pero ta urgi un solucion social pa esnan cu ta biba eynan 

ORANJESTAD (AAN) – Directora di Stichting Fondo di Monumento, señora Anne Witsenburg, den entrevista cu Matutino DIARIO a splica, cu e situacion den Rancho no ta solamente e problema di e fornu di Calki, pero tambe e problema di tanki di awa na Rancho.

Otro ehemplo ta California Light House cu Fondo di Monumento ta doño di e monumento so, y un tereno hopi chikito rond di dje, cu nan mester pa haci mantencion.

“E terenonan rond di dje of nan tin un doño priva, of ta di Land Aruba, anto nos no tin nada di bisa. Esaki no kiermen cu nos no tin vision. Pa cada un di e monumentonan nos tin un vision cu por pas den e bario, pasobra e monumento nunca ta para su so, semper tin di haber cu e bario y e bisiñanan”, señora Witsenburg a señala.

Den pasado Fondo di Monumento a traha varios plan pa e monumentonan menciona, pero nan mester di partnernan y stakeholders pa coopera cu ne. “E tanki di awa na Rancho, ta hopi cerca di e fornu, anto e cas na banda a wordo cumpra door di un persona, nan ta ocupa pa drech’e y renov’e. Nan a acerca nos, nos ta den bon contacto, aworaki nos ta bezig pa wak con nos por coopera pa mehora e tereno rond di e tanki hunto cu e tereno di e cas, esaki ta un bon ehemplo pero cu e cooperacion di tur stakeholder”, Anne Witsenburg a señala.

El a agrega cu den e caso aki nan tin e doño di e tereno na banda, no tin cas pasobra nan a bash’e abao na cuminzamento di e aña aki, pero un stakeholder mas grandi ta e doño di e cas, e herederonan.

“E fornu di calki, antes tabata forma parti di e cura di e cas. Ainda por wak unda e cura a touch cu e fornu di calki, y simbolicamente nos a pone e conexion y e tereno na banda di e calki ta di Land Aruba.  Den pasado, nos a presenta varios vision y diseñonan pa mehora e situacion. Mi ta corda mas cu ocho aña pasa, por ta diez aña, tabata tin un muraya unda hopi mas adicto ambulante tabata biba, anto a kita esaki. Esaki a mehora e situacion un tiki, pero te ainda no tin un soluciona structural pa e tereno, pero ainda mester di un solucion social, pa e personanan ey”, señora Witsenburg a señala.