'AI pa Pueblo' tabata un exito grandi

Segun Simon Waslander:

ORANJESTAD (AAN): Den su columnanan semanal, Simon Waslander a toca e tema di AI varios biaha. Tambe e sa cu bou pueblo tin varios pregunta, opinion y pre-ocupacionnan tocante e fenomeno di AI. Waslander y Aaron Bislip ta kere cu e bentahanan di AI mester ta algo cu ful pueblo di Aruba por gosa di dje.

Den e cuadro aki, hunto cu Centro di Bario Noord, a organisa e sesion inaugural di AI pa Pueblo. E sala

tabata yen y tabata tin discusionnan fuerte y pasiona di diferente di e participantenan.

Den e sesion nan a papia di riesgonan existente cu AI por trece, y tambe e impacto cu AI tin riba medio ambiente si e no wordo uza concientemente. Nan a toca e tema di 'Large Language Models', y con esakinan ta funciona den un forma general, pa asina tur hende tin un nivel basico di comprondemento over con e AI di dia di awe ta hinca den otro.

E sesion a caba cu un curso breve di 'Prompt Engineering', esta e tecnicanan y strategianan cu un persona por uza pa haya e miho resultadonan di AI. Esaki ta un parti esencial cu Waslander y Bislip tin pa cu Aruba. Nan mision ta pa por lo menos 5.000 hende na Aruba tin un nivel basico di comprondemento cu destresanan necesario pa por traha cu AI.

Nan a duna ehempel nan hopi clave, manera con den 10 minuut un AI por traha un beleidsrapport completo di 40 pagina. Den un otro ehempel nos a mustra con AI por yuda studiantenan di famianan di menos recurso pa cu huiswerkbegeleiding, esta pa traha extra opdrachten di training di por ehempel Scheikunde, Natuurkunde y Wiskunde cu nan antwoordsluitel.

Aunke e sesion inaugural tabata un success inmenso, ta te tanto conocimento por wordo comparti den 2 ora. Pa e motibo aki, AI pa Pueblo lo regresa na Centro di Bario Noord, riba diahuebs, dia 25 di Juni, di 2:30 pa 4:00 pm. Tambe lo tin un sesion di AI pa Pueblo na Centro di Famia Piedra Plat, riba diasabra 27 di Juni, for di 7 pa 9'or di anochi.

E ta importante pa full pueblo ta envolvi, den e revolucion tecnologico aki di AI.