AHATA Excellence Awards 2024 a honra 41 trahado excepcional den turismo

ORANJESTAD (AAN: Diasabra anochi a tuma lugar e evento “AHATA Excellence Awards” durante cual a otorga e reconocemento oficial di industria di turismo.

Durante un ceremonia elegante, mas di 250 invitado a reuni na ballroom di The Ritz-Carlton, Aruba pa celebra y premia 41 trahado ehemplar cu ta contibui excepcionalmente na e exito di nos isla su economia.

            Aruba Hotel & Tourism Association ta organisa e premiacion anual pa celebra y gradici personanan cu ta demostra dedicacion inigualabel den un variedad grandi di trabao. E honoradonan a disfruta di un gran anochi, unda nan a ricibi un trofeo special traha pa artista Gilbert Senchi den forma di kokolishi, cual ta simbolo pa hospitalidad. E premionan a wordo presenta riba escenario pa Presidente y CEO di AHATA, Sra. Tisa LaSorte.

            Den e proximo simannan, AHATA lo resalta cada honorado atraves di su medionan social. Pa conoce e personanan excepcional aki y skucha nan splicacion di nan motivacion y pasion, por sigui AHATA riba Facebook na facebook.com/arubahotelandtourismassociation y riba Instagram na @arubahata.

            AHATA ta orguyoso di e trabao impresionante di e honoradonan y ta expresa gratitud profundo pa nan esfuerzo cu ta sigui eleva Aruba como destinacion turistico.