'Agri Fund' lo facilita financiamento pa empresarionan den e sector agricultura na Aruba

Minister Geoffrey Wever:

ORANJESTAD (AAN): Pa soluciona e necesidad pa acceso na financiamento atractivo pa empresarionan den e sector di Agricultura, lo establece un fondo yama Agri Fund. Meta di e Agri Fund ta pa facilita financiamento na un interes atractivo pa (futuro) empresarionan den e sector di agricultura di Aruba. Cu e Agri Fund, Aruba ta pionero den maneho pa stimula na un manera concreto e potencial economico di e sector aki.

            Pa haci e Agri Fund posibel, minister Geoffrey Wever, minister Ursell Arends y Qredits Aruba a firma un Memory of Understanding (MoU), e prome stap pa crea un fondo financiero, Agri Fund pa stimula comercio den e sector di agricultura. E Agri Fund lo ofrece financiamento na un interes reduci di 2% pa sumanan entre Afl. 5.000 y Afl. 200.000. E suma total den e fondo ta 3 miyon florin. Esaki ta demostra cu por logra resultadonan concreto cu poco fondo financiero.

            Establece un Agri Fund ta un momento historico y sigur algo nobo den desaroyo economico di Aruba segun minister Geoffrey Wever. A base di un cooperacion cu un partner serio manera Qredits Aruba ta pone un prome stap concreto pa facilita acceso na financiamento cu un interes reduci pa empresarionan den e sector di agricultura. Banda di e Agri Fund, nos talentonan empresarial tambe por registra pa e Agri Business Academy ofreci den cooperacion cu Qredits Aruba. Ambos, e Agri Fund y Agri Business Academy ta forma e base pa stimula e potencial di e sector di agricultura como industria y diversifica economia di Aruba. Un maneho economico cu ta sirbi como ehempel pa nos hermana islanan Corsou y Bonaire.

            Minister Geoffrey Wever ta gradici Minister Ursell Arends y Qredits Aruba Qredits pa e confianza y bon cooperacion di semper. Un cooperacion cu lo beneficia nos empresarionan, nos desaroyo economico y bienestar general di Aruba.