Acuerdo pa expande WEB cu dos motor RECIP mas

Capacidad extra di 36 MegaWatt

ORANJESTAD (AAN): Recientemente e compania WEB Aruba NV hunto cu Wärtsilä Finland Oy a firma un acuerdo pa e ‘RECIP 3 Expansion Project,’ cual ta encera expansion di planta RECIP III cu dos motor.

   Ta trata di un aumento di e capacidad actual cu 36 MW. Cu e expansion aki lo yega na un total di 230 MW (capacidad instala) di motornan RECIP.

   A celebra esaki durante un ceremonia den fin di siman cu a pasa, na e workshop di planta na WEB den presencia di trahadornan di e compania, y invitadonan. E proyecto ta necesario pa por cumpli cu demanda creciente di energia riba termino medio.

   Manera ta conoci, na augustus 2024 WEB a implementa e planta mobil di 20 MW pa atende cu e demanda pa energia riba termino cortico. Ademas, WEB ta explora posibilidadnan pa instala baterianan pa almacena energia.

   E expertonan local ta consciente di e necesidad imperativo pa sigui explora y studia maneranan pa facilita e expansion di energia renovabel na Aruba. E meta di e iniciativanan aki ta pa cumpli cu e demanda creciente pa energia, pa awor y den futuro. E proyecto ta programa pa keda cla na juni 2026.