Parlamentario Tevreden (MEP):
ORANJESTAD (AAN): Na aña 2023, Organo Ehecutivo AZV y Instituto Medico San Nicolas (ImSan) a tuma pasonan importante pa mehora cuido medico na Aruba.
Recientemente, den un presentacion na Parlamento di Aruba, a splica cu e Praktijk Ondersteuner Huisarts (POH) a wordo introduci den e contexto di un acuerdo di cuido nobo pa fortifica e servicio di cuido riba nos isla.
Parlamentario y Lider di Fraccion di MEP, Hendrik Tevreden a expresa satisfaccion di por ricibi e informacion aki for di e profesionalnan den veld. E maneho y vision ta enfoca riba mehora calidad di cuido y servicio, cu inversionnan den cuido pa asina mantene e fondo di AZV sostenibel. Prevencion ta un aspecto clave den nan maneho.
Bao di un acuerdo firma na 2023 a indica cu ta bay amplia e cantidad di POH y ofrece nan un estudio completo. Ademas di inverti den formacion pa asistentenan di dokter di cas.
Awor, den e marco di e acuerdo aki, AZV a compromete hunto cu Stichting Wit Gele Kruis diabierna 1 di Maart 2024 pa:
- Financia finalisacion di e estudio di POH pa e 27 POHnan actual cu e modulonan Cuido pa Adulto Mayor y Promocion di Salud.
- Amplia cantidad di POH cu 10 mas pa yega na un total di 38, cu e meta pa 2027 pa cada dokter di cas ta dispone di 0.7 FTE di POH.
- Amplia e coordinacion di e trabao POH cu un coordinador mas.
- Mehora e raportahe riba e trabao cu e POHnan ta realisa.
E capacitacion di e POH y ampliacion di e cantidad ta nifica un mihor apoyo pa dokternan di cas pa maneha e salud di aseguradonan di AZV cu lo mehora e accesibilidad di dokternan di cas.
Esaki lo traduci den menos necesidad pa aseguradonan pa yega na specialistanan, locual sigur ta algo hopi beneficioso pa e sistema di salud di e isla, Tevreden a expresa.
Mester agrega cu banda di esaki lo introduci tambe e POH specialisa riba tereno di salud mental “GGZ” (Geestelijke Gezondheid Zorg) y esaki ta algo di aplaudi.
Tabata na 2012 cu pa prome biaha, Aruba a sera conoci cu e concepto di 'Praktijk Ondersteuner Huisarts', y awo exactamente 12 aña despues Aruba por ta orguyoso cu Organo Ehecutivo AZV ta sigui inverti den su hendenan.
==
