Accidente di auto cu a dal riba molina di Savaneta y di Noord a causa  hopi daño

Nathalie Maduro, directora di Santa Rosa ta splica:

*Pa esnan cu mester di awa Santa Rosa tin mas dam pa yuda di biaha 

ORANJESTAD (AAN) – Den entrevista cu directora di Departamento di Agricultura, Cria y Pesca, Santa Rosa (LVV), señora Nathalie Maduro, el a referi na e accidente cu a sosode unda auto a dal contra un molina pa saca awa di pos, y a kibra e pos di Savaneta y esun di Noord.

            Nathalie a menciona cu su Departamento nan ta test e awa regularmente, y den e pos di Noord e tpi ta hopi halto, kiermen cu e awa ta hopi salo. Maduro a duna di conoce cu pesey nan a wanta un poco, y aworaki Santa Rosa tin un alianza cu e seis islanan hulandes, y Curacao ta un Isla cu tin hopi conocemento di posnan y awa subteraneo.

            E conseho cu Santa Rosa a haya di dje ta pa laga descansa e pos un rato, pa wak si cu tempo e ta recupera.

            Esun di Savaneta, Nathalie a bisa, ta algo cu ta fuera di Santa Rosa su alcance, y na e momentonan aki nan ta purba di haya contacto cu e persona cu a traha e rapport pa e seguro. Santa Rosa a manda tur e informacion caba pa e compania pa e seguro por cubri e gastonan. Nan a check un liña nobo, y nan a check e gastonan, pero ta hopi daño e auto a ocasiona. Santa Rosa ta pidi e persona cu tin cu traha e parti di seguro pa tuma contacto cu nan, nan ta manda e-mail, yama na telefon, pero no ta logrando contacto cu ne, pero nada nan ta logrando.

            Nathalie Maduro a informa e personanan cu tin mester di e awa, cu Santa Rosa tin damnan cu awa ainda y nan por entrega e awa di biaha.

Maduro a comenta cu e proteccion pa e molinanan tabata tey caba, cu piedranan grandi, pero e biaha aki nan tin cu consulta cu DOW of DIP, pa nan por pone toch un proteccion un tiki mas fuerte, y tambe pa pidi e personanan cu ta core auto pa tene cuenta cu e lugarnan unda cu tin pos. E biaha aki tabata un molina unda danki Dios no tabata tin ningun cunukero e momento ey yenando awa, pasobra por ta e accidente lo tabata hopi peor. Di parti di Santa Rosa lo haci su maximo esfuerzo pa haci algo, pa evita cu e tipo di accidentenan aki bolbe sosode.