AAA a invita Minister Oduber pa un bishita na e area di construccion di e proyecto Gateway 2030

ORANJESTAD (AAN):  Diahuebs Aruba Airport Authority N.V. (AAA) a yama Minister Oduber bonbini pa un inspeccion na e area di construccion di e proyecto Gateway 2030 na aeropuerto.

            Prome cu a bishita e sitio di e proyecto den un forma safe y sigur pa tur bishitante, Minister Oduber a haya un presentacion di parti di e personal di AAA y e PMO (Project Management Office) cu ta envolvi den e proyecto di Gateway 2030.

            Sr. Gilbert Rafael, Chief Development & Technology Officer na AAA, acompaña pa PMO staff Sr. Henny Balentin, Sr. Project Director, Sr. Gerard Turk, Resident Engineer y Sr. Gerko Rijkers, representante di e contratista ABC Project Venture.

             E presentacion a inclui e ultimo desaroyonan den e asina yama Fase 1A di e Proyecto y tambe riba e tempo cu ainda falta den e plannan actual pa keda cla cu e fase aki. Tambe a wordo elabora riba e otro fasenan di e proyecto y splicacion a wordo duna tocante   e asina yama “blokinan” di construccion di e fasenan.

            Despues di e presentacionnan Minister a wordo acompaña pa Sr. Joost Meijs, CEO di AAA hunto cu e staff di e equipo di proyecto pa duna un amplio splicacion tocante e construccion actual. Minister Oduber por a mira pa su mes kico ta e ultimo desaroyonan den e construccion y con esakinan lo progresa mas aleu.

            “Nos ta sumamente contento y orguyoso di por a mustra Minister Oduber e recien desaroyonan cu ta relata na e proyecto importante cu ta Gateway 2030, cu actualmente ta den su prome fase. E fase aki ta ser premira di lo ta cla den e di 3 kwartaal di 2024 y e siguiente fase lo cuminsa e aña aki cu mobilizacion”, segun Mr. Joost Meijs, CEO di AAA.

            Fase 1A di e construccion di e proyecto lo ensera primordialmente un check-in mas grandi y amplio na e banda mericano. E area mas grandi aki lo ser usa den futuro tambe come check-in area principal pa tur buelo cu lo sali for di AUA Airport. E fase 1A aki tambe ta inclui e desaroyo y construccion di un area di procesa maleta y un area di warda e maletanan prome cu nan wordo hiba avion. Fase 1B e ora ey lo encera e ampliacion di gate number 8, dos extra area di espera cu lo tin 3 brug pa avion y tambe un area nobo pa e avionnan cu lo wordo sirbi dor di busnan pa hiba pasaheronan na e avionnan cu no lo para na un gate cu brug.

            Actualmente e siguiente fasenan di e proyecto ta den revision y lo inclui e otro partinan di e proyecto di Gateway 2030 manera un area nobo di tienda, facilidadnan renoba pa yegada y tambe mas areanan pa servicionan na e pasaheronan cu ta sali for  di aeropuerto di Aruba.

            Lo sigui organiza mas bishita na e area di construccion den futuro pa mantene Minister na altura di e ultimo desaroyonan di e Proyecto di Gateway 2030 na AUA Airport cu ta di sumo importancia pa cu e desaroyo sostenibel di Aruba su turismo y economia en general.