A lansa e prome fase di e plataforma 'Aruba Health App'

Ministerio di Salud, SETAR y AZV:

*Pa medio di e app lo por haci afspraak cerca dokter di cas 

ORANJESTAD (AAN):   Minister di Salud Dangui Oduber a haci e lansamento historico di  e asina yama 'Aruba Health App'. Esaki ta e prome fase di e proyecto di digitalisacion di e sector di cuido medico na Aruba.

            Oduber a bisa cu esaki sigur lo ta un 'game charger' grandi y cu lo cambia e manera con e sistema di cuido medico a wordo maneha durante decadanan aki.

            E prome fase cu ta bay lansa ta caminda e aseguradonan por haci nan afspraak na e dokter di cas haciendo uzo di e plataforma 'Aruba Health App'.

            Pa medio di e plataforma aki lo digitalisa henter e sistema pa haci afspraaknan, pa por haya resultadonan  di testnan, pa haci verwijzing na specialista, como tambe pa wak estadisticanan di e bishitanan na dokter, busca remedi, entre otro, e mandatario a indica.

            El a sigui bisa cu pa logra esaki a cerca director di SETAR algun aña pasa, Director di AZV y a comparti e pensamento aki pa wak si por a sigui explora e posibilidadnan pa digitalisa e sector di cuido medico.

            Dia 7 di november 2023 a firma un acuerdo: "Innovation Partnership' y 'Out the box thinking' entre Ministerio di Salud, SETAR y AZV pa oficialmente e trabaonan cuminsa y pa por lansa e prome fase, e mandatario a duna di conoce.