A honra dos hubilario special sirbiendo pais Aruba

Lisette Tromp y Lienette Dania

ORANJESTAD (AAN): Diaranson mainta Minister Maduro tabata tin e placer di ricibi Lisette I. Tromp pa asina por felicit'e pa su 45 aniversario y Lienette H. Dania cu su 25 aniversario como empleado publico di Pais Aruba.

   Den presencia di Directora, señora Luenne Gomez-Pieters, Inspector di Belasting, señora Monica Brinkenberg y famia, e mandatario a entrega cada uno Lisette y Lienette, nan decreto gubernamental y un bunita recuerdo pa e logro grandi aki.

   Minister Maduro a gradici tanto señora Lisette y Señora Lienette pa tur e añanan di servicio loyal na Gobierno di Aruba. Ademas a felicita y yama danki tambe na nan coleganan y nan famia, cu ta duna nan e sosten, apoyo y cariño pa asina ambos por dedica nan trabao na bienestar di Pais Aruba. Directora di DIMP señora Gomez-Pieters y tambe Inspector di Belasting señora Brinkenberg, kende ta chef directo di e hubilarionan a elabora riba e trabaonan di e hubilarionan. Ambos empleado na nan turno a gradici Minister y nan coleganan y a comparti un poco di nan experiencia y trabao na Departamento di Impuesto.

   Masha pabien y cu nos bon Dios por sigui brinda Lisette Tromp y Lienette Dania hopi bon salud pa asina nan por keda brinda servicio na nos comunidad.