Trahando poco-poco pa un precioso Camaro 1969 haya bida bek

Speedworld

Saludos cordial na mi amigonan di Speedworld, ata aki boso sirbidor Hubert ‘The Furai’ Tiel cu un otro spotlight riba e logro di nos mecaniconan local cu tin e arte di renoba y trece bida bek na un auto clasico cu hopi musculo riba caminda.

   Esey ta loke por a mira di loke Dolf Maduro di Paradera a bin ta haciendo ultimo diesdos añanan.  El a splica cu berdad e tin 12 aña trahando riba e proyecto aki, aunke e auto Chevrolet Camaro aki mes el a bira doño di dje 15 aña pasa.  Debi na contratiempo na comienzo el a laga e auto para te ora el a haya suficiente tempo liber pa traha riba dje.

   E auto aki a sali’e ta costando basta placa pa renoba!  Maduro a indica cu e auto aki su balor awor no ta baha bao di $80.000.  El a bisa cu e motor 427 mes awendia ta costabo $25.000.  E motor di Yenko Chevrolet ta di Aluminium Block.  Esun di Dolf ta di otro material, y pesey el a dicidi na dune e nomber ‘Yenka’.

   E motor ta produci 650HP, cu ta menos di e 750HP cu e ta capaz di produci.  Dolf a splica cu e reduccion a bin debi cu el a cambia e pistonnan.  E pistonnan original di 12:1 compression el a cambia nan pa 10:1, pasobra Dolf ta realistico cu e no ta bayendo pustamento cu e auto aki.

   E body ta di Camaro 1969, un auto cu Dolf tabatin hopi den su coleccion.  El a bende como 7 di nan, y a keda awor cu 2 body so mas.

   Su Camaro 1969 cu el a caba di finaliza cune, ta uno cu originalmente ta Dr. Ayala a yega di cumpre di un persona cu a importe for di Curaçao.  E meta original di e Docter tabata pa desarma e Camaro pa e hibe Colombia.  Pero ora cu su plannan a cambia, el a bende e Camaro aki cu Mai Maduro, y posteriormente el a yega basta getorno den man di Dolf.

   Algo notable ta cu e Camaro 1969 original tabata hard-top, pero ta Dolf Maduro a cambi’e pa uno convertible.  Esey ta algo cu awor Dolf ta lamenta, como cu e conversion di hard-top pa convertible-top a tene su man hopi aña, como cu na final ta tur pieza tin di cuadra perfecto pa acomoda e dak convertible, incluyendo e windshield, dashboard, e glasnan na banda, y tin di instala pomp pa subi y baha e dak.  Pero e pomp aki ta pone cu e top no ta fit perfectamente, pues na final el a haci e convertible uno ‘manual’ pa subi of baha.

  El a gasta casi 50 mil Dollar pa trece bida bek den e auto, y esaki ta debi cu delaster un cos chikito bo tin di order di exterior, y despues di Pandemia e prijsnan a subi drasticamente tambe.

   E Camaro 1969 color cora aki tin manual transmission, cu un motor poderoso cu ora el a start esaki... e sonido cu e V8 aki a produci tabata uno ‘hopi sweet mes’.  Esey ta un final feliz.