Team Nacional di Taekwondo Aruba ta prepara pa Torneo Clasificatorio Panamericano

ORANJESTAD (AAN): Aruba Taekwondo Bond (ARTBO) ta contento di anuncia cu recientemente head coach di Team Nacional di Taekwondo Aruba,

Teo Rodríguez, y atleta Maelynn Fradl a sali pa Spaña pa asisti na un training camp.

            Despues di e periodo intenso di training aki, tanto coach como atleta lo pone nan mira riba Santo Domingo, República Dominicana, pa participa den e training camp di Pan American Taekwondo Union (PATU).

            E programa di training riguroso aki ta vital den nan preparacion pa e proximo Torneo Clasificatorio Panamericano, planea pa luna di April na Santo Domingo.

            E Torneo Clasificatorio Panamericano ta di gran importancia, pa por clasifica na e tan anhela Weganan Olimpico na Paris 2024.

            Durante nan estadia na Spaña, Coach Rodríguez y atleta Fradl lo tin e privilegio di train bao supervision di Sr. Hugo Tortosa, coach renombra di Tortosa Taekwondo Team.

            Aruba Taekwondo Bond ta brinda su apoyo na Coach Rodríguez y atleta Fradl mientras nan ta embarca riba e caminda aki cu gran dedicacion y perseverancia.

            ARTBO ta desea nan hopi exito pa logra nan maximo potencial y clasifica pa Weganan Olimpico.