Team di RCA a bira campeon di Damas Open di AVB

ORANJESTAD (AAN): Diabierna anochi den Compleho Deportivo Guillermo Trinidad na Dakota, a tuma lugar e wega final di ‘Damas Open’ di AVB, y e dos teamnan cu a enfrenta otro tabata SV Britannia y SV RCA.

   E tabata un wega basta igual, unda cada team a presenta e anochi aki cu nan mihor habilidadnan, e pasonan tabata perfecto, y cada uno a sa di anota un goal.

   Wega a finaliza na empate di 1-1, y esey a pone cu a bay den tempo extra.  Sinembargo aki tampoco no a logra di anota mas goal, y cu pitazo final di 1-1, e ora obligatoriamente a bay den tiramento di penalty.

   Aki ta unda cu RCA finalmente despues di siete aña a bay cu e copa di Campeon di Damas, door di anota 5-4.  E miembronan di team a bay braza Ellen de Jong, kende ta esun cu a anota e goal cu a bira esun cu a duna nan e copa.

   Despues di e fiestamento riba veld, a sigui despues un celebracion na RCA Arena na Solito tambe cu a sigui te oranan laat di anochi.