SVGA ta celebra e exitonan di e ultimo añanan

ORANJESTAD (AAN):  Banda di e retonan cu Stichting voor Verstandelijk Gehandicapten Aruba (SVGA) tambe tin hopi exito den e ultimo añanan.

A logra di habri e cas pa mucha y hoben, Cas Blenchi, cu fondonan di e “Sociaal Crises Plan Aruba”.

            E metodo di “Disciplina Consciente” ta wordo usa den cas pa traha mas miho cu posibel na e desaroyo di e muchanan. Cu fondonan di samenwerkende fondsen y hopi ayudo di comunidad a logra un camber pa cada habitante di Cas Sjabururi. Esaki ta mehora e calidad di bida di e habitantenan substancial.

            A cuminsa un cooperacion exitoso cu Stichting Ambiente Feliz na Centro di Cuido na San Nicolas. Akinan hunto nos ta maneha un pasadia pa muchanan cu discapacidad multiple pa esnan cu ta biba cerca nan mayornan y esnan cu ta biba den e casnan di Stichting Ambiente Feliz na Centro di Cuido.           Scol Dun’un man a pasa den un trayecto hopi exitoso di mehora calidad door di implementa liñanan di siña y e methodo “Disciplina Consciente”. Ademas desde e aña aki tin un klas special pa vaknan creativo y desaroyo social-emocional y tin lesnan special pa haya conocimento di e mundo digital.             Nan scol a logra bin cu e producto di pesto di calidad halto tambe cu ta rekeri plantacion y trabao di cushina di e alumnonan. Pa cu productonan cu ta wordo produci na nan departamentonan como parti di e programa di e clientenan por menciona tambe e bunita belanan di centro Man na Obra, y e dushi te di Pasadia Briyo di Solo.

            Pronto lo bin producto nobo door cu  a cumpra un machine pa shredder tuinafval pa traha gordura (cu ayudo di Cede Aruba) y tin un machine nobo pa graveer cu ta duna hopi oportunidad pa productonan nobo.

            E bendemento di producto ta yuda pa cu fundraising pa gastonan pa e clientenan y alumnonan. Awor ta 5 aña caba cu RIU hotel ta sponsor fysiotherapie pa e muchanan di Pasadia Bibito Pin y Pasadia Centro di Cuido, e aña aki a amplia esaki pa e muchanan di scol Dun’un man tambe. E donacion aki ta haci un diferencia grandi pa e muchanan di nan y di Stichting Ambiente Feliz.

            Tin cooperacion cu Kooyman y Fantastic Garden unda nan clientenan di Man na Obra ta bay traha den grupo un par di biaha pa siman y Martijn Trading ta trece trabao pa e clientenan di Man na Obra pa nan traha na nnan centro mes. Nan clientenan ta hopi orguyoso di kico nan por nifica pa comunidad door di traha pa e companianan aki.

            Recien nan scol a ricibi digibord pa tur klas for di e proyecto di gobierno. Esaki sigur lo contribui na e calidad di enseñanza cu nos ta duna. 

Actividadnan pa celebra 60 aña di existencia

            Dia 9 di December 2024 tin un feria di wega pa e alumnonan, clientenan y habitantenan pa celebra e aniversario di 60 aña. Lo tin un fiesta pa trahadonan na december pa gradici cada un pa nan contribucion tur dia pa haci un diferencia den e bida di e clientenan,  alumnonan y habitantenan. Hunto  lo sigui traha pa personanan cu un discapacidad intelectual por desaroya nan mes pa bira mas independiente posibel segun nan capacidadnan.

            SVGA ta gradici comunidad di Aruba di curason pa tur e apoyo durante e 60 aña di existencia di SVGA. Sin ayudo di comunidad nos no por a logra di ta unda nos ta awe.