SV Britannia a titula campeon di Aruba

Final di Division di Honor Liga Oro di AVB

ORANJESTAD (AAN): Hopi emocionante pa publico, tabata e wega final di Campeonato di Futbol 2023-2024, cu e final dramatico unda SV Britannia a titula como Campeon di Aruba.

   Pa e wega aki ta mas hunto, AVB a busca referee Jean Marc Scholtz di Curaçao pa e wega final di Division di Honor, cu a tuma lugar Diahuebs anochi den Compleho Deportivo Frans Figaroa na Shaba.

   E prome goal a cay ya na di 16 minuut, ora cu e futbolistanan di Piedra Plat, esta Luis Coco a duna asistencia di un bala pa Pieter Susebeek, kende a manda e bala den net, pa asina e marcado a bira 1-0.

   E celebracion no a dura mucho, pasobra dos minuut despues, Dakota a sa di iguala e score cu un goal anota pa Garcia.  E empate di 1-1 a haci e resto di wega bira mas interesante, como cu ambos banda tabata busca forma cueste loke cueste pa haya goal.  Y esaki a pone cu wega a cambia un tiki riba veld, y e referee di Curaçao a haye ta actua pa asina pone ordo, y a saca carchi tambe.

   E wega entre SV Britannia y SV Dakota a finaliza 1-1, y a bin e proroga di 15 minuut cada banda.  E score a keda mescos, pues a bay pa e decision final wordo tuma via di penalty shots.

   Despues tiro di penalty, unda despues di cinco tiro a keda empata 4-4.  Despues bay pa sudden death, y Britannia ta titula campeon ora cu Dakota a faya den dos penalty.

   Fanaticonan di SV Britannia a cuminsa cu celebracion mesora, y e Copa di Campeon a wordo entrega door di Ministro Endy Croes.  Despues di un decada, Britannia ta orguyoso cu e Copa di campeon, y por a mira riba e cara di cada hungador cu nan a haci nan best y ta contento cu e resultado.