SPEEDWORLD

Speedworld cu boso amigo Hubert ‘Furai’ Tiel. Awe Speedworld kier a cuminsa na gradici tur esnan cu constantemente ta yama pa puntra pa e columna aki, danki di curason.

   Realidad ta cu nos tabata bezig cu Furai y no tabata resta mucho tempo pa e poco actividad nan cu por a presenta, relaciona cu Motorsport. Awor cu ya nos ta bayendo pa e normal nobo, ta bay tin mas chens cu mas actividad di Motorsport por tuma lugar, y e ora Speedworld ta haya mas cos pa cubri.

   Riba e potretnan cu ta acompaña e relato aki, nos por mira un grupo di Harlistanan, disfrutando di nan bike y di Aruba.

   Porcierto a caba di drenta informacion, cu e Bike Ride pa Dia di Curaçao, a haya greenlight, pa por sigui cune y esey kiermeen, cu di Aruba, sigur lo tin varios persona cu lo bay disfruta di esaki. Keda pendiente pa mas informacion.

   Riba Palo Marga tambe tin algun actividad ta tumando lugar y ta di spera cu mas pronto posible, por habri porta pa mas publico, kitando un banda e asunto di 60 persona maximo como publico.

   Te cu otro siman cu poder di Dios y corda si, ariba caya ta pa core basila, laga coremento duro riba caya pa Polis, Brandweer, Ambulance y Speedworld.