Seleccion di futbol Femenino U-14 y Masculino U-15 a sali bay participa den Challenge Series

*Ambos seleccion a viaha pa Republica Dominicano -  ORANJESTAD(AAN): Diabierna e seleccion nacional di Aruba di futbol Damas U-14

y Mucha Homber U-15 a sali pa Republica Dominicano pa bay competi den Caribbean Football Union (CFU), cu ta un asina yama ‘Challenge Series’.

   Coach di e seleccion di mucha muher a splica cu su equipo ta bay hunga 4 wega y si nan haya suficiente punto nan lo tin cu hunga un wega mas, esta e final riba dia 29 di Augustus.

   Ta prome biaha cu un seleccion di damas ta viaha y ta prome biaha cu e staff ta bay consisti por completo di hende muher.

   “Mi ta kere cu esaki ta un comienzo di e desaroyo di futbol di damas na Aruba”, segun e coach, kende a indica cu e competencia ta bay ta uno di desaroyo.

   E muchanan muher a cuminza ta train 3 biaha pa siman na Mei, mientras cu nan a haya un splicacion amplio di tur e reglanan envolvi den y rond di e wega.

   E muchanan muher ta bay keda den Sheraton Hotel na Santo Domingo, mientras cu e muchanan homber lo hospeda na Barcelo tambe na Santo Domingo.

   E competencia di damas ta bay tuma lugar na Santa Fe Club cu tin un stadion cu yerba artificial, mientras cu e muchanan homber ta hunga riba veld di yerba.

    DIARIO Deportivo a tuma nota cu un di e hungadornan di e seleccion di Damas, tin Layevska Farro, kende na aña 2016 a wordo eligi como Reina Infantil di Carnaval di Aruba.  Sigur un paso ehemplar for di Reina di Carnaval y awor pa Futbolista.  E ta integrante di Team di RCA na Aruba.