Seleccion di Curaçao a domina Aruba y finalisa cu score 2-0

Pa Concacaf Qualifying

ORANJESTAD (AAN): Multitud di hende tabata presente Diasabra anochi den Compleho Deportivo Guillermo Prospero Trinidad na Dakota, pa asina presencia e prome wega di cualificacion pa World Cup 2026.  Hopi a bay mira con Stadion a keda remodela, cu veld di turf completamente nobo, y iluminacion cu ta yuda hasta e smartphone di mas bieu saca potret excelente anochi.

   Resultado final a bira 2-0 pa e seleccion di Curaçao.  E team aki a mustra cu nan ta funciona como un network perfecto riba veld.  A demostra cu e ekipo di hermana isla ta funciona bon bao wowonan di nan famoso coach Dick Advocaat.

   Sinembargo e seleccion di Aruba a presenta un gran bataya, y a sa di actua basta defensivo, como cu Curaçao tabata eherce presion enorme.  No obstante esey, Aruba no a laga nan anota ningun goal den e prome mitar di wega.

   Den di dos parti di wega, tabata parce cu Curaçao a haya un peptalk cu a pone cada hungador produci mas adrenalina y riba veld a bira mas conciente di pasonan di bala, y asina na di 58 minuut, Curaçao a anota un goal danki na nan hungador Juninho Bacuna.

   Aruba e ora a manera haya un wake-up call, y a sigui haci nan intento pa ataca e network bon hinca den otro door di Advocaat.

   Aunke Curaçao a scop hopi mas biaha den direccion di goal compara cu Aruba, esnan crioyo a percura pa nan no a hinca goal mas.

   E wega a bay den minuutnan di descuento keto bay na 1-0, pero net den ultimo rosea di wega, na di 96 minuut, e hungador Xander Severina a manda un goal pa asina Curaçao su marcado a bira 2-0.

   Durante wega di Diasabra anochi, e seleccion di Aruba a ricibi 2 carchi.

   E siguiente wega di Aruba lo bay ta Diamars 11 di Juni contra team di St. Lucia.  Esaki lo tuma lugar na Barbados.