Seleccion di Aruba Girls U14 a bay cu nan prome victoria ganando 7 pa 0 e equipo di US Virgen Island

ORANJESTAD (AAN)- Diadomingo atardi e eleccion di Aruba Girls U14 a debuta den gran forma den e CFU Challenge Series Boys & Girls tournament na Republica Dominicana.

Despues di un torencial awacero cu a hera para e wega y cu un retraso di 1 ora, e seleccion femenino den e edad bao14 a hunga nan prome wega den e Club Santa Fe den e capital di Santo Domingo. Contrincante tabata US Virgen Islands cu tabata un contrincante desconoci pa Aruba.

Mester bisa cu na e prome minuut nan di wega ya caba por a nota e dominio di e damita nan riba Virgen Island. Tanto den delanteria, medio campo y defensa, Aruba su seleccion tabata sublime. E combinacion perfecto entre e defensa y e medio campo a hasi cu cada bes e delanteronan tabata core liber unda haya e bon oportunidad di anota gol.

Sinembargo e tironan di leu ta esnan cu a hasi tur e daño na e porteria di Virgen Island. E hobencita Loredana Nepi-Perez tabata simplemente grandi pa Aruba cu 3 gol anota di leu. Esaki a conta tambe pa Michaela Netto y Bindiya Wadhani cu tambe a anota cada uno 1 gol for di leu.

E otro dos golnan di Aruba a bini di Wendy Angela y Sharriene Vrolijk cu a anota di cerca. Na final entrenador Milly Henriquez tabata contento cu su pupilonan y cu e wega hunga. Aruba a usa tur su hungadornan den e wega aki mirando e ta un torneo di desaroyo. Notable ta cu varios mayor a hasi e viahe pa Republica Dominicana pa asina apoya nan yiu(nan).

Ayera Dialuna e team di Aruba ta prepara pa enfrenta e seleccion di Corsow. E wega ta programa pa 5.30 di atardi, pero door di ciere tempran di DIARIO, lo bin cu e resultado den e siguiente edicion.