Sede di Comite Olimpico Arubano ta bay bira e Cas di Deporte pa tur hende

Thomas Bach di International Olympic Committee a corta cinta

ORANJESTAD (AAN): Fase 1 di e proyecto di sede di Comite Olimpico Aruba (COA) a keda cla, y Diasabra a toca honor na Thomas Bach, e presidente di International Olympic Committee pa corta e cinta den presenta di presidente Wanda Broeksema di COA y Nicole Hoevertsz kende ta Secretaria General di COA.

   Un satisfaccion grandi ta pa mira un publico enorme cu a bay pa presencia e momento aki.  E sonrisa riba cara di diferente atleta, contento cu na Aruba awor Deporte oficialmente a haya nan sede, cu ta priminti di lo sigui habri e caminda mas hancho pa nan logra nan metanan.

    Paden tin un muraya di tur e atletanan olimpico, un muraya di e weganan anterior unda ta mira potret di delegacion y atletanan.  Tin un camber dedica completamente na un galeria na e uniform deportivo di COA cu ta un elemento asina importante pa e organizacion.

   Tin un pasiyo dedica na e columna vertebral di e organizacion, cu ta e parti tecnico di deporte, apoyando e federacionnan y cu ta duna sosten na e deportistanan y entrenadornan.  Tin tambe dos muraya, uno na e estrellanan di awe, y un muraya dedica na e futuro di deporte.

   Despues di Fase #1, lo bay cu apoyo financiero pa e Fase #2 cu ta encera un Museo Olimpico pa Aruba, unda lo invita scolnan pa bay eynan, cu ta unda nan lo duna charla, workshops, tene reunion, pa percura pe henter Aruba cera conoce cu e mundo di deporte y su balor.

   Si bo mira e edificio aki, dilanti a bin cu full un piso colorido, yen veld deportivo, y ambiente mester ta cu esaki ta e cas olimpico y cas di deporte di Aruba, y tur hende mester sinti nan mes bon bini pa bishita.