Revancha di domino ta den tapara

ORANJESTAD (AAN) -  Diasabra 1 april ultimo a tuma luga e tan spera encuentro entre e rivalnan di semper Team Snor y Sero Blanco Dt.. Un bataya cu hopi “connoisseur” di domino a spera di ta un anochi di kibra nervio y yena cu adrenalina.

Sinembargo, manera nan ta bisa na Hulandes, “het is met een sisser afgelopen”! E fecha di 1 april muy probabel a hunga un rol importante, ya cu e desaroyo di e anochi aki ni na Hollywood nan lo por a traha su script!

Ni con hende draai su cabes rond di e cos aki, e ta keda un misterio total. Halftime ta drenta y cu wowonan di coneu den luz di foks di mei anochi, Sero Blanco ta staar n’un scoreboard indicando cu nan ta perdi cu nada menos 1 pa 11! Un berdadero “donderslag bij heldere hemel”, un scenario di horor; Saturday April 1st, Fool’s Day, y net e dia ey bo bateria di domino ta flauw flauw!

Segundo tempo ta cuminsa y Sero Blanco ta haci un intento heroico pa toch scapa cara y logra lo practicamente imposibel contra e mashin matematico di Nelson “Snor” Perez, pero den no time, locual muy probabel lo keda conoci pa generacionnan largo como “E Masacre di 1 April”, a tuma luga. Team Snor ta cera e anochi c’un score increibel di 21 - 7, y ban spera cu esaki no ta motibo pa “straatnamencommissie” cambia e nomber di bario pa “Sero 1 April”! Mester menciona si cu e dama capitan di Sero Blanco a logra pasa clean board si, pero manera nan ta bisa na Ingles, “too little, too late”! E “afstraffing” ya tabata inevitabel.

Pero, shonnan, esnan cu conoce Sero Blanco, ya sa caba cu e revancha ta den tapara! Esaki lo bira en berdad e revancha di siglo. Tambe, segun e horea na muraya, den “wandelgangen” tin papia di un ekipo nobo cu lo bay haci su debut; un tal “Stone Strikers”. En todo caso, aña 2023 ya caba ta priminti di ta un sambombaso di aña!