Reunion importante pa haya sa con pa mehora competencianan di Drag Racing na Aruba

ORANJESTAD (AAN): Diahuebs anochi na di dos piso di Carquest Autoparts na Piedra Plat, Humphrey Kock kende ta propietario di e auto Mazda RX8 yama Nightmare Racing

y persona cu na aña 2000 a pusha duro pa asina bin cu e categoria di Import, a yama un reunion cu e doñonan di autonan Extreme Import y Baby Import.

   E reunion ta relaciona cu un peticion haci na su persona di parti di ADM, relacion pa cu e autonan Import, por haya un mihor espacio riba Palo Marga, mirando cu e categoria aki di autonan Extreme y Baby import, ta conoci di ta hopi atractivo y ta hala hopi publico hiba International Raceway Park Palo Marga.

   Durante e reunion aki, a puntra e coredornan, kico ta loke mas lihe nan lo kier mira sosode, pa asina bin back riba pista y un di e remarkenan cu mas a resona ta, cu nan kier wak cu e pista ta worde mas miho trata cu ‘compound’, pa asina tin mas ‘traction’, ya cu ta conoci cu e autonan aki, mester di bon ‘traction’, pa asina por pone tur e horsepower posible y asina duna un bon show.

   Tur hende sa cu e pista di Palo Marga mester di un cambio grandi pa asina sigura e coredornan un bon pista pa core, pero mientras tanto, por cuminsa cu mihor traction pa e categoria aki, cu manera ya a menciona, ta uno cu ta hala hopi publico. Un otro opcion cu a bin dilanti, ta cuminsa na fula e autonan aki, na solamente mita pista, prome cu bay ful pista y confronta problema cu e autonan di Extreme Import cu ta esunnan cu por core mas duro, no bay kibra y despues ta dura basta tempo prome cu bin back, mirando cu keto bay Gobierno di Aruba, no a laga traha un ley caminda lo por tin un despensatie pa cu e piesanan di careda, cu ya caba ta hopi halto y e belasting ta matando e coredornan cu ta haci esaki, como deporte y na hopi oportunidad a sa di defende e nomber di Ariba grandemente.

   Di tempo cu e categoria aki a cuminsa pa awo, ya tin 10 auto cu a kibra e no a bin back. Tin varios auto no ta worde traha, pero atrobe ta e hecho, cu e belasting cu ta worde cobra, ta manca e cartera di e doñonan. Un tempo Aruba tabata conta cu categoria di Pro Stock tanto auto como brommer, cu tambe ta hala bon publico, pero pa e mesun motibo di belasting halto, e categorianan a muri.

    Relaciona cu e reunion teni, un comision lo worde institui, pa asina representa esnan di e categoria di Import y asina bay papia cu ADM pa drecha loke mester worde drecha, pa e categorianan aki por bolbe duna tremendo presentacion, cu ta e atraccion pa e publico atrobe.