Representante di COA a bay pa Panama pa ricibi “Certificacion Nacional de Deporte Seguro”

ORANJESTAD (AAN): Como parti di e “Worldwide Olympic Movement”, e importancia di “Safe Sport”, pues percura pa tur hende por ta parti di e mundo di deporte den un manera sano y sigur, ta di gran importancia.

Den cuadro di esaki, COA a percura pa cuminsa cana e procesonan necesario pa logra establece un comision pa maneha esaki y crea concientisacion riba esaki. Debi na un oportunidad otorga door di:  “La Comisión de Mujer, Equidad y Deporte Seguro de la Organización Deportiva Suramericana (ODESUR)”, a logra haya un cupo pa participa na e curso di “Certificación Nacional de Deporte Seguro – Nivel Básico”, cu a ser organisa door di e Comite Olimpico di Panama, cual a tuma lugar na prome instante virtual, y lo culmina cu un presentacion presencial dia 18 awor na Panama City, Panama. 

            Pa Aruba, Betzabeth Rasmijn, un persona hopi dinamico y cu animo pa aporta na e mundo deportivo, a ser escogi pa participa den e curso aki. Fin di siman awor e lo sali rumbo pa Panama, pa asina presenta su proyecto. Prome cu a hasi esaki, a sinta hunto cu Monica Fajardo di e departamento tecnico “Direccion di Deporte” y Secretaria General, Nicole Hoevertsz di COA pa asina elabora riba e informacion cu a ricibi durante e curso entre otro con e por wordo adapta pa e situacion di Aruba y mira locual Betzabeth tin prepara pa presenta. 

            Sigur un combersacion ameno cu hopi informacion, pero mas importante aun hopi entusiasmo cu tin pa asina por cuminsa e proceso di inicia cu e proyecto aki na Aruba. COA ta desea Betzabeth hopi exito durante su ultimo siman di curso, y cu gran alegria ta warda su regreso pa asina por cuminsa traha den bienestar di deporte na Aruba. 

Fuente: Facebook Page COA