Prome biaha Aruba cu medaya di brons na Weganan Parapanamericano na Chile

Gran logro di Elliott Loonstra den Taekwondo 

ORANJESTAD (AAN): E bon noticia internacional cu a drenta den fin di siman, ta indica cu pa prome biaha cu un atleta di Aruba a logra gana medaya na e weganan Parapanamericano 2023 cu ta tumando lugar na Santiago di Chile.

   Esaki tabata Diasabra atardi den e disciplina di Para Taekwondo den e categoria di Homber 80 kilo.  Den e competencia teni na Centro de Deportes de Contacto valido pa medaya di brons, e ganador a bira Elliott Loonstra di Aruba, kende a gana Joel Gomes di Brasil cu score di 27-22.  Den e competencia aki, e paraatleta di Brasil a ricibi 3 punto di penalty.

   E resultado final ta cu Molina Andres di Costa Rica a gana medaya di brons, Luis Najera di Mexico a gana medaya di plata, y tanto Elliott Loonstra di Aruba y Claro Lopes kende tambe ta di Brasil a ricibi un medaya di brons cada uno.

   Na final, Elliott Loonstra a indica cu el a keda cu un bon sentimento despues di e resultado aki.  “Mi alegria ta asina halto,” el a bisa.  Su sonrisa tabata uno cu ta demostra cu di berdad e ta hopi orguyoso di e logro aki.  Y cu placer a mira e bandera di Aruba bay halto durante ceremonia di medaya, hunto cu bandera di Costa Rica, Mexico, y Brasil.

   Algo fenomenal tabata cu despues di e ceremonia, ta varios atleta tabata yega cerca di Elliott Loonstra, y tabata pidi’e pa e skirbi cu marker su firma riba nan uniform.  Y esaki tabata algo fenomenal pa mira.  Elliott cu tur su pasenshi tabata cumpli cu e peticion di demas atletanan.

   Sigur un pabien na henter e delegacion di Aruba Paralympic Committee cu ta na Weganan Parapanamericano, como cu nan a logra haci Aruba orguyoso.