Nicole Hoevertsz a hiba palabra na apertura campeonato Panamericano di Beach Tennis

Celebrando desaroyo di deporte na nivel regional

ORANJESTAD (AAN): Diaranson anochi den un ambiente grandi y cu hopi energia, a haci e apertura oficial di e campeonato Panamericano di Beach Tennis, cu a tuma lugar den fin di siman na sede di Beach Tennis Aruba, na Eagle, cerca di Eagle Aruba Beach Resort.

   Aki a mira 17 diferente pais cu a prepara un delegacion grandi, contando cu alrededor di 325 atleta cu lo participa. Aruba mes ta conta cu un gran cantidad di atleta, sobrepasando mas di 45 cu lo enfrenta otro paisnan den diferente categoria di edad, y evento. Den e grupo di atleta di Aruba por mira varios cara conoci, cu den algun momento of otro a participa pa Aruba den delegacionnan di Weganan di e Ciclonan Olimpico anterior.

   Na comienzo di e anochi, Secretaria General di Comite Olimpico y Vice Presidente di Comite Olimpico Internacional, Señora Nicole Hoevertsz a hiba palabra, expresando su felicidad y entusiasmo di mira un evento di e magnitud aki ta tuma lugar na Aruba. Den nomber di COA y Aruba a desea tur atleta cu ta participa hopi exito, y a gradici e organizacion di Beach Tennis Aruba y e federacion di Tennis Aruba pa cu e organizacion.