Motornan nobo den Carting no ta wordo influencia mas door di calor

ORANJESTAD (AAN): Den fin di siman, DIARIO Deportivo a tuma nota di caredanan tumando lugar riba Pista di Carting na Bushiri.

   Howard Cheng a confirma cu e caredanan aki na Bushiri Carting, tabata e di 3er ronda di 2022.  El a admiti cu nan a cay un tiki atras, como cu pa 2022 nan tabatin planea di organiza 7 careda.  Awor na September, apenas nan ta na Careda #3.

   El a splica cu nan ta sigui cu e caredanan pa mehora e training, coordinacion, y precision di e coredornan.  El a bisa cu segun e plan original, nan tabata sperando cu pa October venidero lo bin un team di Curaçao pa tene careda na Aruba, pero tur cos ta mustra cu nan lo bay cambia e fecha.

   Den futuro tin pensa di bin cu caredanan grandi unda ta trece Curaçao, tambe Colombia, Bonaire, y Panama pa participa.  Kizas un coredor di Hulanda tambe lo bin.

   Hecho ta cu pa hopi tempo no tabatin careda organiza di Carting, y e biaha aki a trece e caredanan aki pa hende por bin bek den dje.  Pa otro aña tin pensa di bin cu caredanan di Point Series pa Carting.

   Hasta kier bin cu esun cu gana na final cu punto, pa manda e coredor den exterior pa adkiri mas experiencia.

   DIARIO a nota cu den fin di siman, nan tabata coriendo den dia, bao solo pisa.  Segun Cheng, esaki no ta problema!  Pasobra e motornan nobo den Carting ta watercooled cu no ta wordo afecta pa e calor extenso.

   Antes tabata motornan air-cooled cu por wordo afecta.  Pero awor ta motornan cu radiator, y prestacion no ta cay asina hopi.  Anochi cu ta mas fresco, bo ta haya mas speed aunke no hopi diferencia.

   Aruba tin awor tambe un grupo di Junior cu motor di 100cc cu ta 5 coredor entre 11 te cu 14 aña cu ta bayendo basta bon.  Luna pasa a bay core na Bogota cu e grupo y nan a haci bon papel.  Na fin di December lo tin otro campeonato na Colombia y lo kier bay eynan atrobe.

   E futuro generacion?  Tin hopi speranza, pasobra ya caba tin par di coredor di 6 te cu 8 aña cu ta core categoria di motor mini di 60cc, y esaki ta haci e organizadornan hopi feliz mes.