ORANJESTAD (AAN): Den marco di e compromiso continuo cu desaroyo deportivo y infrastructura deportivo pa mucha y hoben,
Ministerio di Deporte, a tene un reunion constructivo y importante cu representantenan di FIFA y Federacion di Futbol di Aruba (AVB), pa concretisa y finalisa e palabracionnan tocante e proyecto: ‘FIFA Arena’.
E proyecto innovativo ta contempla e creacion den fase 1 di dos mini turf na dos veld cu a wordo selecciona entre Gobierno, AVB hunto cu FIFA y lo ser anuncia pronto. E iniciativa ta forma parti di un programa piloto global di FIFA, y Aruba ta honra di wordo selecta como un di e locacionnan pa implementacion. E veldnan aki ta wordo acopla na vecindarionan di scol of clubnan cu tin teamnan activo di mucha y hoben. E iniciativa aki ta banda di e inversionnan cu lo tuma luga tambe pa veldnan grandi di turf.
Minister Gerlien Croes a confirma den un carta oficial dirigi na AVB dia 22 di mei ultimo, cu Gobierno di Aruba ta brinda apoyo total na e proyecto, y cu preparacionnan inicial a cuminsa den forma di reunion cu stakeholdernan local relevante. Consulta cu instancianan gubernamental y otro partnernan ya ta tumando luga, y e siguiente fase lo envolvi coordinacion operacional pa por prepara e terenonan.
E proyecto ‘FIFA Arena’ lo fortalece nos infrastructura deportivo y amplia e oportunidadnan pa nos hubentud pa participa den deporte den un manera accesibel. Ministerio di Deporte ta compromete pa sigui traha man den man cu FIFA, AVB y stakeholdernan relevante pa sigura implementacion exitoso.
