Minister Gerlien Croes a reconoce varios atleta pa nan logronan sobresaliente den deporte

Aruba ta briya riba tarima internacional

ORANJESTAD (AAN):  Aruba ta sigui briya riba tarima internacional, demostrando cu talento, disciplina y dedicacion por hiba nos pais na un nivel mas halto. Minister di Deporte, mr. Gerlien Croes, a ricibi y reconoce varios atletanan cu a representa Aruba cu orguyo y excelencia den diferente disciplina deportivo.

Cu hopi orguyo, Minister Gerlien Croes a honra Patrick Hill, cu a forma parti di e delegacion di Special Olympics, despues di logra un medaya di oro den categoria A di bowling. Esaki ta un logro cu ta pone Aruba firmemente riba mapa deportivo mundial, resaltando importancia di inclusion y oportunidad igual pa tur atleta.
"Patrick a demostra cu su esfuerso y determinacion, no tin limitacion cu por stop bo di alcansa bo meta", Minister Gerlien Croes a expresa durante e reconocemento.

Ademas, Aruba a logra sobresali den mundo di equitacion. Minister Gerlien Croes a ricibi y reconoce Sheyxiene Geerman, Zachary Coffie y Cathelin Ras pa nan prestacion den Competencia di Equitacion Inter na Corsou. Nan a representa Aruba cu orguyo, trece medayanan pa nos isla y fortalece reputacion di nos cabayistanan internacionalmente.

Minister Gerlien Croes a enfatisa cu Gobierno ta compromete pa sigui inverti y apoya e desaroyo di deporte na Aruba, pa duna mas oportunidad na atletanan local pa destaca y representa nos isla riba tarima local y internacional.

Pabien na tur, danki pa eleva deporte di Aruba na un nivel mas halto. Aruba por ta orguyoso di boso!